قازاقستان پوليسەيلەرى نيدەرلاندىنىڭ ايبەرگەن قالاسىندا ءوتىپ جاتقان شاعىن فۋتبولدان «World Police Indoor Soccer Tournament» حالىقارالىق ءتۋرنيرىنىڭ جەڭىمپازى اتاندى، دەپ حابارلايدى aqshamnews.kz.
Polisia.kz مالىمەتىنە ساي، بۇل جارىس 1982 جىلدان بەرى وتكىزىلىپ كەلەدى جانە جىل سايىن الەمنىڭ تۇكپىر-تۇكپىرىنەن ءتۇرلى مەملەكەتتىك قۇرىلىمداردىڭ قىزمەتكەرلەرىن جينايدى.
جالپى بۇل سپورتتىق سايىسقا پوليسيا قىزمەتكەرلەرى، ءورت سوندىرۋشىلەر، كەدەن قىزمەتكەرلەرى، اسكەريلەر مەن سالىق ينسپەكتورلارى قاتىسادى. جارىس ءتورت سانات بويىنشا وتكىزىلەدى: ەرلەر، ايەلدەر، 35 جاستان جانە 45 جاستان اسقان ەر ادامدار. وتكەن جىلى تۋرنيرگە 25 ەلدەن 106 كوماندا قاتىستى. بيىل دا قاتىسۋشىلار سانى سول دەڭگەيدە.
قازاقستان ءىىم نامىسىن شىمكەنت قالاسى پوليسيا دەپارتامەنتىنىڭ قىزمەتكەرلەرى قورعادى. ولار جوعارى دايىندىق دەڭگەيىن كورسەتىپ، ءبىرىنشى ورىندى يەلەندى.