«Hamkorlik-2021» وقۋ-جاتتىعۋى وزبەكستاننىڭ وڭتۇستىگىندە ورنالاسقان «تەرمەز» وڭىرلىك پوليگونىندا وتەدى.
بيىل 17-24 قاراشا ارالىعىندا قازاقستان مەن وزبەكستان ەلدەرىنىڭ بىرلەسكەن وقۋ-جاتتىعۋى وتپەك، دەپ حابارلايدى Almaty-akshamy.kz
بىرلەسكەن مانيەۆرلەردىڭ ماقساتى بىرلەسكەن تاپسىرمالاردى شەشۋدە باۋىرلاس ەكى ەلدىڭ ءوزارا ءىس-قيمىلى مەن ۇيلەسىمدىلىك دەڭگەيىن ارتتىرۋ بولىپ تابىلادى.
ەلىمىزدەن وقۋ-جاتتىعۋعا 100-دەن اسا اسكەري قىزمەتشى قاتىسىپ، سۋ-30سم كوپفۋنكسيونالدى جويعىشتار بۋىنى، س-295 اسكەري-كولىكتىك ۇشاقتار، تاكتيكالىق ۇشقىشسىز ۇشۋ اپپاراتتارى جۇمىلدىرىلادى. قازاقستان بولىمشەلەرى ورىندايتىن وقۋ-جاۋىنگەرلىك تاپسىرمالارىنىڭ قاتارىنا ىزدەۋ-بارلاۋ وپەراسيالارىن جۇرگىزۋ، قارسىلاستىڭ تاجىريبەلى جاساقتارىن جويۋ كەزىندە جاۋىنگەرلىك قورعاۋ بولىمشەلەرىنىڭ ءىس-قيمىلدارىن پىسىقتاۋ، شابۋىل جاساپ زاڭسىز قارۋلانعان قۇرالىمداردى جويۋ، ۇرىس الاڭىنان جارالىلار مەن ىستەن شىققان تەحنيكانى كوشىرۋ كىرەدى.