كەشە قازاقستان ءوز الاڭىندا بەلارۋس قۇراماسىن قابىلدادى
فۋتبولدان قازاقستان قۇراماسى UEFA ۇلتتار ليگاسىنىڭ ۆ ليگاسىنا جولداما الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كەشە قازاقستان ءوز الاڭىندا بەلارۋس قۇراماسىن قابىلدادى. قازاقستاندىق فۋتبولشىلار ءۇشىن ولار - قولايسىز قارسىلاس. ەكى قۇراما بۇعان دەيىن بىر-بىرىمەن التى ويىن وتكىزگەن.
ونىڭ ەكەۋى تەڭ ناتيجەمەن اياقتالسا، قالعانىندا بەلارۋستەر جەڭىسكە جەتكەن ەدى.
وعان قوسا تۋرنير كەستەسىندە قازاقستاندىق فۋتبولشىلار كوش باستاپ تۇرسا، بەلارۋس قۇراماسى نەبارى ەكى ۇپايمەن ءتورتىنشى ورىندا كەلە جاتقان بولاتىن.
ايتا كەتسەك، بۇگىن قازاقستاندىق فۋتبولشىلار جەڭىسكە جەتسە، قۇراماسى الداعى ماۋسىمداعى ۇلتتار ليگاسىندا ۆ ديۆيزيونىندا ەۋروپانىڭ الدىڭعى قاتارلى قۇرامالارىمەن سىنعا تۇسۋگە مۇمكىندىك الادى.
وعان قوسا 2024 جىلعى ەۋروپا چەمپيوناتىنىڭ ىرىكتەۋ ويىندارىنا قاتىسۋىنا جول اشىلاتىن.
وسىنداي سەبەپتەرگە بايلانىستى كەزدەسۋ تارتىستى باستالدى. ەكى قۇراما العا قاراي ۇمتىلدى.
دەگەنمەن ويىننىڭ ءبىراز بولىگىنە دەيىن تابلوداعى ەسەپ وزگەرگەن جوق. كەزدەسۋدىڭ 29-مينۋتىندا قازاقستاندىق ميحايل گابىشيەۆ ەسەپ اشتى.
بۇدان كەيىن دە قازاقستاندىق فۋتبولشىلاردىڭ ەسەپ اشاتىن بىرنەشە مۇمكىندىگى بولدى. دەگەنمەن ونى پايدالانا العان جوق.
ال 45-مينۋتتا بەلارۋس فۋتبولشىسى پاۆەل ساۆيسكيي تارازى باسىن تەڭەستىردى.
ەكىنشى كەزەڭنىڭ 79-مينۋتىندا قازاقستاندىق باكتيور زاينۋتدينوۆ گول سوقتى.
وسىلايشا قازاقستان قارسىلاسىن 2:1 ەسەبىمەن جەڭدى.
ناتيجەسىندە الداعى ماۋسىمدا ۆ ليگاسىندا ويناۋعا مۇمكىندىك الدى. قازاقستاندىق فۋتبولشىلار بەلارۋسكە قارسى جەتى ويىنعا سوزىلعان ساتسىزدىكتەر سەرياسىن وسىلايشا بۇزدى.
ەندى قازاقستان قۇراماسى 25 قىركۇيەكتە سىرت الاڭدا ازەربايجانمەن كەزدەسەدى.
ايتا كەتسەك، قازاقستاندىق فۋتبولشىلار س ليگاسى ءۇشىنشى توبىندا سىنعا تۇسەدى. قارسىلاستارى - بەلارۋس، ازەربايجان مەن سلوۆاكيا.