قازاقستان 2025 جىلدىڭ ءساۋىر ايىنا دەيىن سىرداريا وزەنى ارقىلى شامامەن 11 ملرد تەكشە مەتر سۋ الادى.
ورتالىق ازيا ەلدەرىنىڭ وكىلدەرىمەن كەلىسسوزدەر جۇرگىزگەن سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ وسى جونىندە كەلىسىمگە قول جەتكىزدى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
مينيستر مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 87ء-شى وتىرىسىنا ەلىمىزدىڭ اتىنان قاتىستى. وتىرىس تۇركىمەنستاننىڭ اشحاباد قالاسىندا ءوتتى. كەزدەسۋگە تاجىكستان، تۇركىمەنستان جانە وزبەكستاننىڭ سۋ شارۋاشىلىعى ۆەدومستۆولارىنىڭ باسشىلارى قاتىستى. ال، قىرعىزستان ەلىنىڭ وكىلدەرى باقىلاۋشى رەتىندە قاتىستى.
ناتيجەسىندە، 1 ساۋىرگە دەيىن ەلىمىزدەگى شاردارا سۋ قويماسىنا 11 ملرد تەكشە مەتر سۋ كەلەدى دەپ كۇتىلۋدە. بۇل 2025 جىلعى سۋارۋ ماۋسىمىندا ەلىمىزدىڭ وڭتۇستىك ايماقتارىنا قاجەت سۋ كولەمىن جيناقتاۋعا مۇمكىندىك بەرەدى.
ايتا كەتۋ كەرەك، وتىرىسقا قاتىسۋشىلار سىرداريا جانە امۋداريا وزەندەرى باسسەيندەرىندەگى سۋ قويمالارىنىڭ بولجامدى جۇمىس كەستەسىن بەكىتتى، سونىمەن قاتار 2024-2025 جىلداردىڭ كۇزگى-قىسقى كەزەڭىنە ورتالىق ازيا ەلدەرىنە سۋ بەرۋ كولەمىن ايقىندادى.
«بيىل كەلىسسوزدەر مەن بىرلەسكەن جۇمىستىڭ ناتيجەسىندە ءبىز سىرداريا وزەنى باسسەينىندە سۋدى ءتيىمدى بولۋگە قول جەتكىزدىك. سونداي-اق، 86-شى وتىرىس قورىتىندىسى بويىنشا بىرلەسىپ اتقارىلعان جۇمىسقا وڭ باعامدى بەرگىم كەلەدى. اتاپ ايتقاندا، قىرعىزستانمەن سۋ-ەنەرگەتيكالىق ىنتىماقتاستىق تۋرالى كەلىسىمدەر جۇزەگە اسىرىلدى، سونداي-اق بيىل سۋارۋ ماۋسىمىندا «باحري-توچيك» سۋ قويماسىنىڭ جۇمىس كەستەسىن ۇيلەستىرۋ بويىنشا ءىس-شارالار قابىلداندى»،– دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
مسشۇك كەلەسى، 88ء-شى وتىرىسى 2025 جىلدىڭ ءبىرىنشى توقسانىندا دۋشانبە قالاسىندا وتەدى.