وتكەن جىلى بۇل كورسەتكىش $32 ملن دەيىن ءوستى.
قازاقستان وتكەن جىلى ورگانيكالىق اۋىل شارۋاشىلىعى ونىمدەرىنىڭ ەكسپورتىن $32 ملن دەيىن ارتتىردى. جوعارى سۇرانىستى ەسكەرە وتىرىپ، سالا ماماندارى ءوندىرىس كولەمىن ودان ءارى ارتتىرۋ ءۇشىن مەملەكەتتەن قولداۋ كۇتەدى، دەپ حابارلايدى Almaty-akshamy.kz Eldala.kz سىلتەمە جاساپ.
«اتامەكەن» پالاتاسىندا ORGANIC جوبالىق كەڭسەسى اياسىندا سالا ماماندارىنىڭ قاتىسۋىمەن العاشقى اشىق وتىرىس ءوتتى.
"2021 جىلى ەلدەن $32 ملن ورگانيكالىق ءونىم ەكسپورتتالدى، 2019 جىلى ەكسپورت $15 ملن، 2020 جىلى $10 ملن قۇرادى. نەگىزگى تاۋارلار-ورگانيكالىق زىعىر، بيداي، سويا، كۇنباعىس، جاسىمىق بولىپ تابىلادى. از مولشەردە كۇنباعىس مايى، اراق پەن بال ەكسپورتتالادى"، - دەدى ۇكپ اگروونەركاسىپتىك كەشەندى دامىتۋ دەپارتامەنتىنىڭ ديرەكتورى ەربول ەسەنيەۆ.
ول بۇگىنگى تاڭدا ورگانيكالىق شارۋاشىلىق 300 گەكتاردان استام جەرگە جۇرگىزىلەتىنىن اتاپ ءوتتى.
ساراپشىلار حالىقارالىق سەرتيفيكاتتاۋدىڭ جوعارى قۇنىن، مەملەكەتتىك قولداۋدىڭ جەتكىلىكسىزدىگىن، ورگانيكالىق داقىلداردى ءوندىرۋ جانە ساتۋ ماسەلەلەرىندە ءبىلىم مەن تاجىريبەنىڭ تاپشىلىعىن قازاقستاندا ورگانيكانىڭ دامۋىن تەجەيتىن فاكتورلار دەپ اتايدى.
جۇيەلىك ماسەلەلەردى شەشۋ ءۇشىن اۋىل شارۋاشىلىعى مينيسترلىگى، Qazaq Organic وداعى، UNION Atameken جانە سالا وكىلدەرى جوبالىق كەڭسەنىڭ 2022 جىلعا ارنالعان جۇمىس جوسپارىن بەكىتتى. اتاپ ايتقاندا، ورگانيكانى دامىتۋدىڭ جول كارتاسىنىڭ جوباسىن ازىرلەۋ، جۇڭگو باعىتىن قوسا العاندا، جاڭا نارىقتارعا شىعۋ مۇمكىندىكتەرىن پىسىقتاۋ جوسپارلانۋدا. سونداي-اق، جوبالىق كەڭسەنىڭ نازارىندا: زاڭنامالىق بازانى جەتىلدىرۋ، PGS-قازاقستان بىرلەسكەن كەپىلدىكتەر جۇيەسىن قۇرۋ، وقىتۋ، عىلىمي-تەحنولوگيالىق جانە ءبىلىم بەرۋدى قولداۋ، قارجىلىق قولداۋ قۇرالدارىن قاراۋ، ورگانيكالىق وندىرۋشىلەردىڭ شىعىندارىن سۋبسيديالاۋ ماسەلەلەرىن شەشۋ.
بۇۇ دامۋ باعدارلاماسىنىڭ وكىلى فيرۋز يبراگيموۆتىڭ ايتۋىنشا، ۇيىم قازاقستانداعى ورگانيكالىق ءونىم وندىرۋشىلەرمەن تىعىز بايلانىستا.
"ءبىز جوبالىق كەڭسەنى قولداۋعا جانە وندىرۋشىلەرىمىزبەن جانە ورگانيكالىق ەگىنشىلىك بويىنشا سەرىكتەستەرىمىزبەن جۇمىس ىستەۋگە دايىنبىز"، – دەپ سەندىردى ول.
ءوز كەزەگىندە Qazaq Organic Union وداعىنىڭ ديرەكتورى ارسەن كەرىمبەكوۆ حالىقارالىق باعدارلامالاردىڭ جۇمىسىن سىنعا الىپ، ورگانيكانى دامىتۋ جونىندەگى جۇمىستىڭ جاڭا تاسىلىنە كوشۋدى ۇسىندى.
"ۇكىمەت ورگانيكامەن اينالىساتىن كاسىپكەرگە سۋبسيديا بەرگىسى كەلەدى. ءبىز ۇكىمەتكە ەسەپ بەرۋىمىز كەرەك. سۋبسيديا الۋ ءۇشىن ەسەپ بەرىپ، قاجەتتىلىگىن دالەلدەۋ قاجەت. ءبىز حالىقارالىق باعدارلامالاردا قاراجات سۇرامايمىز، بىزگە ءسىزدىڭ تاجىريبەڭىز قاجەت. ءبىزدىڭ مامانداردى وقىتۋ جەتكىلىكتى. وسى باعىتتا بىرگە جۇمىس ىستەيىك"، - دەپ ۇسىندى ارسەن كەرىمبەكوۆ.
كەزدەسۋ سوڭىندا كاسىپكەرلەر مەن ساراپشىلار كەڭسە اياسىنداعى بىرلەسكەن جۇمىس تۋرالى كەلىستى.
جوبالىق كەڭسەنىڭ كەلەسى وتىرىسىندا ءبىلىم بەرۋ سالاسىنداعى ورگانيكانى دامىتۋ تالقىلانادى.