جاھاندىق اۆتوكولىك ساتىلىمى كۇرت تومەندەگەن، ءبىرقاتار كومپانيالار ءوندىرىستى توقتاتتى.
سەبەبى الەم ەلدەرىندە جەڭىل اۆتوكولىكتەر ساتىلىمى ازايعان، دەپ حابارلايدى Almaty-akshamy.kz Finprom.kz-كە سىلتەمە جاساپ.
بيىل الەمدىك اۆتوموبيل نارىعى داعدارىستىق جاعدايدا.
ماسەلەن، ەۋروپالىق اۆتوموبيل وندىرۋشىلەر قاۋىمداستىعىنىڭ مالىمەتتەرى بويىنشا، ەۋروپادا جەڭىل اۆتوكولىكتەردىڭ ساتىلىمى ءساۋىر ايىنداعى كورسەتكىش بويىنشا ءبىر جىل ىشىندە 20،2%-عا تومەندەپ، 830،4 مىڭ اۆتوكولىكتى قۇرادى. سالىستىرار بولساق، 2021 جىلدىڭ ساۋىرىندە بۇل كورسەتكىش 1 ملن-نان اسقان.
تىكەلەي ەۋروپالىق وداق (ەو) ەلدەرىندە ساتۋ كولەمىنىڭ تومەندەۋى 20،6%-دى قۇرادى. ەۋروپادا سەكتورداعى ساتىلىمنىڭ ەڭ كوپ ازايۋى ليتۆادا (-34،9%)، يتاليادا (-33%)، شۆەيساريادا (-29،1%)، دانيادا (-29%)، فينليانديادا (-25،8%) جانە اۆستريادا بايقالادى (−26،6%).
ەۋروپالىق اۆتوموبيل وندىرۋشىلەر قاۋىمداستىعىنىڭ مالىمەتتەرى بويىنشا، تەرىس ديناميكا جارتىلاي وتكىزگىشتەردىڭ (چيپتەردىڭ) تاپشىلىعىنا بايلانىستى جاڭا اۆتوكولىكتەردى جەتكىزۋدەگى كىدىرىستەرگە بايلانىستى. ال رەسەي مەن ۋكرايناداعى گەوساياسي داعدارىس سالدارىنان لوگيستيكالىق ماسەلەلەر كۇشەيگەن. بۇعان قوسا، قىتايداعى COVID-19-دىڭ ءورشۋى سەكتورعا كەرى اسەر ەتۋدە.
اۆتوكولىك كومپانيالارى بويىنشا ەۋروپادا 2022 جىلدىڭ ءساۋىر ايىندا ساتىلىمنىڭ كۇرت تومەندەۋى Stellantis-تە بايقالادى: كورسەتكىش بىردەن 28% تومەندەدى. سونىمەن قاتار، Volkswagen Group-تىڭ ساتىلىمى 28%-عا، Jaguar Land Rover Group - 27،7%، Mazda - 27،4%، Volvo - 23%، Mercedes-Benz - 22،6%-عا قۇلدىراعان.
چيپتەردىڭ جەتىسپەۋشىلىگىنە بايلانىستى Stellantis پەن Ford وتكەن اپتادا يللينويس، كەنتۋككي جانە ونتاريوداعى زاۋىتتاردا ءوندىرىستى ۋاقىتشا توقتاتتى. بۇل تۋرالى Foley Automotive كومپانياسىنىڭ 2022 جىلعى 18 مامىرداعى ەسەبىندە جازىلعان.
داعدارىستان زارداپ شەككەن اۆتوكولىك مودەلدەرىنىڭ قاتارىندا Jeep Cherokee، Ford Escape، Ford Edge، Lincoln Corsair جانە Lincoln Nautilus بار. بۇعان قوسا، وتكەن اپتادا Stellantis بولشەكتەردىڭ جەتىسپەۋشىلىگىنە بايلانىستى ۆيندزورداعى (ونتاريو) شاعىن اۆتوبۋس زاۋىتىندا ءوندىرىستى ۋاقىتشا توقتاتتى.
ءوز كەزەگىندە، جاپونيادا Toyota قىتايداعى COVID-19 سالدارىنان ەنگىزىلگەن لوكداۋن اسەرىنەن مامىر ايىندا 12 زاۋىتتا ءوندىرىستى 6 كۇنگە دەيىن قىسقارتادى، ال جاھاندىق ءوندىرىس جوسپارى شامامەن 50 000 كولىككە ازايدى. سونىمەن قاتار، Toyota جوعارى شيكىزات شىعىندارى مەن جارتىلاي وتكىزگىشتەردىڭ ۇزدىكسىز تاپشىلىعى كومپانيانىڭ كەلەسى جىلداعى كىرىسىن شامامەن 20% تومەندەتۋى مۇمكىن ەكەنىن اتاپ ءوتتى.
«الايدا قازىرگى ەكونوميكالىق تۇراقسىزدىق بولجام جاساۋدى قيىنداتىپ وتىر»، – دەپ حابارلادى كومپانيادا.
اقش-تا جاڭا جەڭىل كولىكتەردىڭ ساتىلىمى ءبىر جىل بۇرىنعىدان 56،3%-عا، قىتايدا – 43،4%-عا، جاپونيادا – 14،4%-عا، وڭتۇستىك كورەيادا – 11،8%-عا، كانادادا – 8،4%-عا، مەكسيكادا – 1%-عا تومەندەدى. قورىتا ايتقاندا، كولىك داعدارىسى الەمنىڭ بارلىق ەلدەرىن قامتىدى.