وقۋشىلار بەس مەدال جەڭىپ الدى.
قازاقستاندىق وقۋشىلار فيزيكا پانىنەن ءححىى ازيا وليمپياداسىندا 5 مەدال جەڭىپ الىپ، ۇزدىك ۇشتىككە ەندى. ۇلتتىق قۇراما قورجىنىندا 1 كۇمىس جانە 4 قولا مەدال بار، دەپ حابارلايدى Almaty-akshamy.kz.
«رەسپۋبليكامىزدىڭ نامىسىن الەمدىك ارەنادا نۇر-سۇلتان، الماتى، پاۆلودار، اتىراۋ جانە اقتوبە قالالارىنىڭ 10-11 سىنىپتارىنىڭ 8 وقۋشىسى قورعادى. ولاردىڭ بارلىعى رەسپۋبليكالىق فيزيكا وليمپياداسىنىڭ جەڭىمپازدارى مەن جۇلدەگەرلەرى»، - دەلىنگەن ءبىلىم جانە عىلىم مينيسترلىگىنىڭ باسپا ءسوز قىزمەتىنىڭ حابارلاماسىندا.
بيىل زياتكەرلىك سايىستار 2022 جىلعى 24 مامىر مەن 31 مامىر ارالىعىندا قاشىقتان فورماتىندا ءوتتى. وعان جۇڭگو، مالايزيا، رۋمىنيا، رەسەي، سينگاپۋر، ساۋد ارابياسى، تۇركيا، تايلاند، وڭتۇستىك كورەيا، قىرعىزستان جانە ت.ب. سياقتى الەمنىڭ 27 ەلىنىڭ وكىلدەرى قاتىستى.
«ءبىلىم جانە عىلىم مينيسترلىگى وقۋشىلارىمىزعا باسقا ەلدەردەن كەلگەن جاسوسپىرىمدەرمەن جارىسقا ءتۇسۋ مۇمكىندىگىن ارتتىرۋ ءۇشىن بارلىق جاعدايدى جاساپ جاتىر. جاقىندا عانا وقۋشىلارىمىز حيميا پانىنەن 56-شى حالىقارالىق مەندەلەيەۆ وليمپياداسىندا 8 مەدال جەڭىپ الدى. سونداي-اق وقۋشىلارىمىز العاش رەت فرانسياداعى دۇنيەجۇزىلىك گيمنازياداعا قاتىسىپ، ۇزدىك ۇشتىككە ەندى. فيزيكا پانىنەن ازيا وليمپياداسى ەڭ قيىن وليمپيادالاردىڭ ءبىرى بولىپ ەسەپتەلەتىنىن ايتا كەتكەن ءجون. ال ءبىز الەمدىك پاندىك وليمپيادالاردا ءداستۇرلى تۇردە كوشباسشى سانالاتىن ەلدەردى دە باسىپ وزدىق. وقۋشىلارىمىز بەس مەدالمەن قوسا ەكى قۇرمەت گراموتاسىنا يە بولدى»، - دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ورىنباسارى نۇرلان جۇماگەلدى.
فيزيكا پانىنەن ازيا وليمپياداسىنداعى جەڭىس وقۋشىلارعا ۇلتتىق قۇراماعا ەنۋگە جانە قازاقستاننىڭ نامىسىن حالىقارالىق فيزيكا وليمپياداسىندا (IPhO) قورعاۋعا مۇمكىندىك بەرەدى.