قازاقستان زاڭىندا زايىرلى مەملەكەت ەكەنى ايتىلعان
قازاقستان ازاماتتارى ەركىن ويلايدى، بۇل ەلدە ءسوز بوستاندىعى بار. بۇل تۋرالى ريم پاپاسى فرانسيسك قازاقستان بيلىگىنىڭ وكىلدەرى، ازاماتتىق قوعام جانە ديپلوماتيالىق كورپۋس وكىلدەرىمەن كەزدەسۋى كەزىندە ايتتى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
«قازاقستاننىڭ ازاماتتىق قوعامىنا قۇرمەتىمدى بىلدىرەمىن. قازاقستانداعى ۇيلەسىمدىلىكتى قازاقتىڭ ۇلتتىق اسپابى دومبىراعا تەڭەر ەدىم. وسى جاقىندا دومبىرا اسپابىنىڭ قازاق ءۇشىن ءمان-ماڭىزى تۋرالى ەستىپ ءبىلدىم. ورتا عاسىردا كەيبىر دومبىرادا وينالعان شىعارمالار بار ەكەن. بۇل تۋىندىلار سول كەزدەگى قوعامنىڭ، حالىقتىڭ باسىنان وتكەرگەن جايتتارىمەن، وقيعامەن بايلانىستى. قازاقستان باتىرلار مەن ويشىلدار، سۋرەتشىلەردىڭ جەرى. بۇل جەر مادەنيەتكە تولى. قازاق حالقى كوشپەلى ەل بولعان. تاريحتا باسىنان وتكەرگەن قيىن-قىستاۋ كەزدەردى باتىلدىقپەن ەڭسەرە بىلگەن حالىق»، - دەدى ريم پاپاسى.
ونىڭ ايتۋىنشا، قازاقستاندا باتىس پەن شىعىستىڭ ۇيلەسىمدىلى بار. ەلدەگى 150-دەن استام ەتنوستىق توپتىڭ، 80-نەن استام ءتىلدىڭ ءارقايسى ءوز ەرەكشەلىگىن ساقتاپ وتىر.
«قازاقستان زاڭىندا زايىرلى مەملەكەت ەكەنى ايتىلعان. قازاقستان ءولىم جازاسىن تولىقتاي جويعانى ءۇشىن العىسىمدى ايتقىم كەلەدى. بۇل ەلدە ازاماتتاردىڭ وي جانە ءسوز ەركىندىگى بار ەكەن. قوعامنىڭ ءار مۇشەسى تەڭ قۇقىلى. ازاماتتىق قوعام الەۋمەتتىك وسال ساناتتىڭ قامىن ويلايدى»، - دەپ باعا بەردى ريم پاپاسى.