قازاقستاننىڭ بۇۇ جانىنداعى تۇراقتى وكىلى ماعجان ءىلياسوۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاسيا جونىندە قۇجاتتى بۇۇ دەپوزيتارييىنە ساقتاۋعا تاپسىردى.
بۇل قادام ەلىمىزدىڭ ادام قۇقىقتارىن قورعاۋعا جانە وسى سالاداعى ءوزىنىڭ حالىقارالىق مىندەتتەمەلەرىن ورىنداۋعا دەگەن بەرىك بەيىلدىلىگىن راستايدى. قازاقستان حاتتاماعا قوسىلعان بۇۇ-عا مۇشە 193 مەملەكەتتىڭ ىشىنەن 90-شى مەملەكەت بولدى. قازاقستاننىڭ وسى حالىقارالىق قۇجاتقا قوسىلۋ جولىنداعى العاشقى قادامى ونىڭ 2020 جىلعى 23 قىركۇيەكتە نيۋ-يوركتە قول قويۋى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سودان كەيىن، 2021 جىلعى 2 قاڭتاردا ق ر پرەزيدەنتى قاسىم-جومارت توقايەۆ وسى قۇجاتتى راتيفيكاسيالاۋ تۋرالى زاڭعا قول قويدى. حاتتاما ەرەجەلەرىنە سايكەس ەلدىڭ ۇلتتىق قىلمىستىق زاڭناماسىن حاتتاما نورمالارىنا سايكەس كەلتىرۋ تالاپ ەتىلدى. 2021 جىلعى 29 جەلتوقساندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءولىم جازاسىن جويۋ ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
وسىلايشا، ەكىنشى فاكۋلتاتيۆتىك حاتتاماعا قوسىلۋ قازاقستاندا ءولىم جازاسىنىڭ تولىق جويىلۋىن بەكىتىپ، قىلمىستىق زاڭنامانى جالپى ىزگىلەندىرۋ باعىتىن جالعاستىردى. ءولىم جازاسىن قولدانۋ قازاقستان رەسپۋبليكاسىندا ق ر پرەزيدەنتىنىڭ 2003 جىلعى 17 جەلتوقسانداعى ءتيىستى موراتوريي ەنگىزۋ تۋرالى جارلىعىمەن توقتاتىلدى. 2022 جىلعى 16 ناۋرىزدا قازاقستان حالقىنا جاساعان «جانا قازاقستان: جاڭارۋ مەن جاڭعىرۋ جولى» اتتى جولداۋىندا مەملەكەت باسشىسى قاسىم-جومارت توقايەۆ «ءولىم جازاسىنا تىيىم سالۋ تۋرالى شەشىمدى ءبىرجولا بەكىتۋ ءۇشىن كونستيتۋسياعا ءتيىستى وزگەرىس ەنگىزۋ قاجەت» دەگەن ۇسىنىس جاساعان بولاتىن.