قازاقستاندا مۇناي وڭدەۋ كولەمى تۇراقتى ءوسىپ كەلەدى: 2020 جىلى 15،8 ملن توننادان 2024 جىلى 17،9 ملن تونناعا دەيىن ارتتى. بۇل ءوسىم — ۇكىمەتتىڭ 2022–2023 جىلدارى جۇزەگە اسىرعان مۇناي ونىمدەرىن ءوندىرۋ جۇيەسىن رەفورمالاۋدىڭ كەشەندى جوسپارىنىڭ ناتيجەسى. رەفورما اتىراۋ، پاۆلودار جانە شىمكەنت مۇناي وڭدەۋ زاۋىتتارىن، سونداي-اق مۇناي ونىمدەرىن تاراتۋ جانە اينالىم جۇيەسىن قامتىدى.
رەفورما اياسىندا وندىرىستىك پروسەستەرگە تولىق اۋديت جۇرگىزىلدى، ءبىرىڭعاي تەحنيكالىق قىزمەت كورسەتۋ جۇيەسى قالپىنا كەلتىرىلدى، مۇناي وڭدەۋدىڭ بىرىكتىرىلگەن مودەلى ەنگىزىلدى، ءتيىمسىز دەلدالدار جويىلدى. اگروونەركاسىپ كەشەنىنە جانار-جاعارمايدىڭ باسىم جەتكىزىلۋى قامتاماسىز ەتىلىپ، وتىننىڭ ماقساتتى بولىنۋىنە باقىلاۋ كۇشەيتىلدى، مۇناي ونىمدەرىن ەلدەن جانە ەاەو اۋماعىنان تىس جەرگە شىعارۋعا شەكتەۋلەر قويىلدى. سونداي-اق كوتەرمە جانە بولشەك باعالاردى رەتتەۋ شارالارى قابىلداندى. وسى قادامدار 2024 جىلى ىشكى نارىقتى تۇراقتاندىرۋعا مۇمكىندىك بەردى: ديزەل وتىنىنىڭ قورى 268 مىڭ توننادان 612 مىڭ تونناعا دەيىن ەكى ەسە ارتتى. اي-92 جانە اي-95 بەنزيندەرىنىڭ قورى تيىسىنشە 404 جانە 85 مىڭ توننانى قۇرادى. ديزەل مەن بەنزينسىز قالعان جانارماي قۇيۋ بەكەتتەرىنىڭ سانى 10 ەسەگە ازايدى. قازىرگى ۋاقىتتا ججم قورى جەتكىلىكتى دەڭگەيدە.
ناتيجەسىندە، العاش رەت ىشكى نارىق تولىق قامتاماسىز ەتىلگەن جاعدايدا اي-92 ماركالى جوعارى ساپالى بەنزيننىڭ ارتىعى ەكسپورتتالا باستادى.
مەملەكەت باسشىسى ەلىمىزدىڭ ەكونوميكاسىن ءارتاراپتاندىرۋ جانە كومىرسۋتەكتەردى تەرەڭ وڭدەۋگە باسىمدىق بەرۋ مىندەتىن قويدى. بۇل باعىت قازاقستان ءۇشىن تەك قاجەتتىلىك ەمەس، بالاماسى جوق جولعا اينالدى.
قازاقستان مۇناي وڭدەۋدى دامىتۋدىڭ ۇزاقمەرزىمدى ستراتەگياسىن جۇزەگە اسىرۋدا
- اۆتور الماتى اقشامى
- 12:00، 07 مامىر 2025
