كەزەكتەن تىس پرەزيدەنت سايلاۋىندا ءوز ۋچاسكەسىندەگى العاشقىلاردىڭ ءبىرى بولىپ قورعانىس ءمينيسترى رۋسلان جاقسىلىقوۆ داۋىس بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءوز تاڭداۋىن جاساعاننان كەيىن مينيستر ەل بويىنشا قارۋلى كۇشتەرگە قاتىسى بار 130 مىڭعا جۋىق ادام داۋىس بەرىپ جاتقانىن اتاپ ءوتتى.
«قازىرگى تاڭدا اسكەري بولىمدەر مەن مەكەمەلەر اۋماعىنداعى 20 سايلاۋ ۋچاسكەسىندە مەرزىمدى قىزمەتتەگى ساربازدار مەن كۋرسانتتار داۋىس بەرىپ جاتىر. قارۋلى كۇشتەردەن بارلىعى 130 مىڭعا جۋىق اسكەري قىزمەتشى، ازاماتتىق پەرسونال جانە ولاردىڭ وتباسى مۇشەلەرى داۋىس بەرۋگە قاتىسۋدا»، – دەدى رۋسلان جاقسىلىقوۆ.
ال ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەن ادىلەت ءمينيسترى قانات مۋسين №66 مەكتەپ-ليسەيدە ورنالاسقان سايلاۋ ۋچاسكەسىندە داۋىس بەردى.
اقپارات جانە قوعامدىق دامۋ ءمينيسترى دارحان ءقىدىرالى ءوزى تىركەلگەن سايلاۋ ۋچاسكەسىنە داۋىس بەرۋشىلەر كوپ كەلىپ جاتقانىن جازدى.
«ازاماتتىق پارىمىزدى وتەپ، تاڭداۋىمىزدى جاسادىق. ءبىز تىركەلگەن سايلاۋ ۋچاسكەسىنە داۋىس بەرۋ ءۇشىن كەلىپ جاتقاندار كوپ. ەلىمىزگە قايىرلى بولسىن»، - دەپ جازدى ول Facebook-تەگى پاراقشاسىندا.
عىلىم جانە جوعارى ءبىلىم ءمينيسترى ساياسات نۇربەك داۋىس بەرۋگە جۇبايىمەن بىرگە بارعانىن جازدى.
«بۇگىن ەل قاتارلى سايلاۋ ۋچاسكەسىنە بارىپ، جۇبايىم ەكەۋمىز داۋىس بەردىك. ەل ەرتەڭى ءۇشىن ءوز تاڭداۋىمىزدى جاسادىق. سەبەبى سايلاۋدا اركىمنىڭ داۋىسى ماڭىزدى دەپ ەسەپتەيمىن. تۋعان ەلىمىز - قازاقستانىمىزدىڭ ىشكى ماسەلەلەرىن سىرتتان ەشكىم شەشپەيتىنىن، مەملەكەتىمىزدى بىزدەن باسقا ەشكىم دامىتا المايتىنىن مويىندايىق. بارلىعى ءوز قولىمىزدا. ءوز ەلىنىڭ سانالى، كەمەل، بەلسەندى ازاماتى بولۋ – ناعىز ءپاتريوتيزمنىڭ كورسەتكىشى. بۇل ۇلكەن جاۋاپكەرشىلىك»، - دەيدى ساياسات نۇربەك.
ايتا كەتەيىك، ورتالىق سايلاۋ كوميسسياسىنىڭ بەرگەن مالىمەتىنە سۇيەنسەك، ەلىمىزدە داۋىس بەرۋ قۇقىعى بار 11 827 277 ازامات تىركەلگەن. ولار رەسپۋبليكا اۋماعىندا ورنالاسقان 10 101 سايلاۋ ۋچاسكەسىندە داۋىس بەرەدى. ال 53 شەت مەملەكەتتەگى 68 ۋچاسكەدە 12 527 قازاقستان ازاماتىنا داۋىس بەرۋ مۇمكىندىگى جاسالعان.
ەلىمىزدەگى 86 ۋچاسكەدە داۋىس بەرۋ وزگە ۋچاسكەلەردەن 1 ساعات بۇرىن باستالدى.
بۇعان دەيىن وسك كەزەكتەن تىس پرەزيدەنت سايلاۋىنىڭ بارىسىن 641 حالىقارالىق بايقاۋشى قاداعالايتىنىن ءمالىم ەتكەن ەدى.
ورتالىق سايلاۋ كوميسسياسى ساعات 10.05-كە دەيىن قانشا قازاقستاندىق داۋىس بەرگەنىن ءمالىم ەتتى.
