اتىراۋدا دزيۋدودان قازاقستان بىرىنشىلىگى مارەسىنە جەتتى. ەل بىرىنشىلىگىندە باپكەرلەر قۇراما ساپىنداعى بالۋاندار مەن جاستاردىڭ شەبەرلىك دەڭگەيىنە نازار اۋداردى. قۇراما ساپىنداعى ءبىرقاتار بالۋاندار بابىندا ەكەنىن تاعى ءبىر مارتە دالەلدەسە، ەندىگى ءبىرى قارسىلاسىنا ەسە جىبەرىپ قويدى. مۇنداي تارتىستى بەلدەسۋلەر ەرلەر اراسىنداعى باسەكەدە بايقالدى. قازاقپارات ءتىلشىسى ەلىمىزدىڭ ەرلەر قۇراماسىنىڭ باس باپكەرى نۇربول سۇلەيمەنوۆپەن سۇحبات بارىسىندا بالۋانداردىڭ بابى، جاستاردىڭ بەلسەندىلىگى جانە الداعى ماقساتتار جونىندە وي بولىسكەن ەدى. سول سۇحباتتى Almaty-akshamy.kz Inform.kz-كە سىلتەمە جاساپ ۇسىنىپ وتىرمىز.
- ءتورت كۇنگە سوزىلعان ەل بىرىنشىلىگىنەن كەيىن قانداي وي ءتۇيدىڭىز؟ قاي سالماق دارەجەسىندە باسەكەلەستىك جوعارى ەكەنى اڭعارىلدى؟ بايقاعانىمىز، كەيبىر سالماقتاردا بەلگىلى بالۋاندار قارسىلاستارىنا ەسە جىبەرىپ قويدى. بۇل باسەكەلەستىكتىڭ جوعارى بولعانىن كورسەتە مە؟
- ەشقانداي بەلدەسۋدى ءبولىپ-جارىپ ايتا المايمىن. ماعان ۇناعانى، 73 كەلى سالماقتا باسەكەلەر اسا تارتىستى ءوتتى. سونداي-اق، 60 جانە 66 كەلى سالماقتارىندا دا جانكۇيەرلەر قىزىقتى بەلدەسۋلەر تاماشالادى دەگەن ويدامىن. بۇل سالماقتاردا بالۋاندار اراسىندا باسەكەلەستىك بايقالدى.
اتاپ ايتساق، 60 كەلىدە اتىراۋلىق قانات سەيىلحان چەمپيون اتاندى. ول بىلتىر ەل بىرىنشىلىگىندە قولا جۇلدەگەر اتانعان ەدى. بيىل جاقسى دايىندىقپەن كەلگەن. بابىندا ەكەنىن كورسەتتى. چەمپيون اتاندى. بۇل - وتە جاقسى كورسەتكىش. وزدەرىڭىز بىلەتىندەي، اتالعان سالماقتا ماعجان ءشامشادين مەن باۋىرجان ناربايەۆ بولعان. ەكەۋى دە جارىسقا كەلدى. الايدا، ءبىرىنشى جانە ەكىنشى اينالىمنان وتە العان جوق.
ەندى 66 كەلى سالماق دارەجەسىنە كەلەتىن بولساق، بىلتىر چەمپيون بولعان بالۋان بيىل ءۇشىنشى ورىندى قاناعات تۇتتى. ال بۇرىننان كۇرەسىپ جۇرگەن ەسەت قۋانوۆ دەگەن شاكىرتىمىز بيىل جاقسى دايىندالىپ كەلگەنىن اڭعارتتى. ناتيجەسىندە جەڭىمپاز تۇعىرىنا كوتەرىلدى.
- جارىس بارىسىندا ۇلتتىق قۇرامادا سىنعا ءتۇسىپ جۇرگەن ماعجان ءشامشادين مەن عۇسمان قىرعىزبايەۆ سىندى بالۋاندار قارسىلاستارىنا ەسە جىبەرىپ قويدى. بۇل جونىندە قانداي پىكىردەسىز؟
- الدىمەن عۇسمان قىرعىزبايەۆ جايىندا ايتا كەتسەم، ول جارىس بارىسىندا ءسال سىرقاتتانىپ تۇرعانى بايقالدى. تىماۋ بولسا دا، تاتاميگە شىعۋعا بەل بايلادى. سونداي-اق، ول جىل بويىنا بىرنەشە جارىسقا قاتىستى. بالكىم، شارشاڭقىلىق بايقالعان شىعار.
جالپى، سايىس بارىسىندا ءبارى دە بولادى. اركىم ءوزىنىڭ قاتەلىگىنەن ساباق الادى. بۇل بالۋاندارعا الداعى ۋاقىتتا قاتەلىك جاساماۋعا مۇمكىندىك جاسايدى. تاتامي تورىندەگى تارتىستى باسەكەلەر الداعى ۇلكەن جەتىستىكتەرگە جول اشادى. بالۋاندار وسى ماقساتتا تىنباي تەر توكتى. دايىندىعى جوعارى بولعانى جەڭىمپاز قاتارىنان كورىندى. ال بيىل جەتىستىككە قول جەتكىزە الماعانى، الداعى جىلداردا ول ولقىلىقتىڭ ورنىن تولتىرادى. ونى بيىلعى بىرىنشىلىك بارىسىندا ايقىن اڭعاردىق. سوندىقتان بالۋاندارعا ۇنەمى دايىندىعىن پىسىقتاپ، بابىندا بولۋعا كوڭىل ءبولۋى ءتيىس. سوندا عانا جوعارى ناتيجەنى باعىندىرۋعا جول اشىلادى.
- ەندى اۋىر سالماقتاعى بالۋاندار بەلدەسۋىنە توقتالا كەتەلىك. وندا قانداي بەلدەسۋلەر كوڭىلىڭىزدەن شىقتى؟
- بيىل 100 كەلىدەن جوعارى سالماقتا اباي وبلىسىنىڭ بالۋانى ءادىل ورازبايەۆ جەڭىمپاز اتاندى. ول بىلتىر فينالدا سۇرىنگەن ەدى. سول كەتكەن قاتەلىگىنىڭ ورنىن تولتىردى. نەگىزىندە ەل بىرىنشىلىگىندە ىرىكتەلگەن بالۋانداردى الداعى ۋاقىتتا ءتۇرلى جارىستارعا الىپ بارامىز. وعان العاشقى ءۇش ورىن العان سپورتشىلار تاڭداپ الىنادى. ولاردى ۇلكەن دودالاردا سىناپ كورەمىز.
- الدا قانداي جارىستار كۇتىپ تۇر؟ بالۋاندار قانداي باسەكەلەردە باعىن سىناپ كورەدى؟
- بيىلعى جىلدىڭ ەنشىسىندە حالىقارالىق دەڭگەيدەگى ەكى ۇلكەن جارىس كۇتىپ تۇر. اتالعان جارىستار ناتيجەسى بويىنشا بيىلعى جىلدى قورىتىندىلايمىز.
ال الداعى جىلى پورتۋگاليا ەلىندە تاعى ۇلكەن جارىس كۇتىپ تۇر. ودان كەيىن بالۋاندار فرانسيادا تاعى ءبىر باسەكەدە ب ا ق سىنايدى. وسىلايشا جارىستار جالعاسا بەرەدى. سول جارىستاردا ەل بىرىنشىلىگىندە ۇزدىكتەر قاتارىنان كورىنگەن بالۋاندار ءوز شەبەرلىگىن كورسەتە الادى.
- ەل بىرىنشىلىگىندە جاستاردىڭ بەلدەسۋى كوڭىلىڭىزدەن شىقتى ما؟
- بيىلعى ەل بىرىنشىلىگىندە باسەكە تارتىستى وتكەنىن ايتا كەتەيىك. جاس بالۋاندار دا كوڭىلدەن شىقتى. ولاردىڭ بابىندا بولۋى ءبىزدى قۋانتتى. بالۋاندار تاراپىنان وسىنداي دامۋدى بايقادىق. بۇل - قۋانارلىق جاعداي. شەبەرلىگى ءوسىپ كەلە جاتقان جاستار بارشىلىق. الداعى ۋاقىتتا ولاردىڭ قابىلەت-قارىمىن، شەبەرلىگىن تارازىلايتىن بولامىز.
- الدا - پاريج وليمپياداسى. وعان دايىندىق بارىسى قالاي بولىپ جاتىر؟ وعان ۇپاي جيناۋ باستالىپ كەتتى ەمەس پە؟
- راس، ۇپاي جيناۋ جارىستارى باستالدى. الداعى جىلدىڭ مامىر ايىنا دەيىن جينالعان ۇپايدىڭ جارتىسى عانا ەسەپتەلەدى. ودان كەيىنگى ۇپايلار تولىقتاي جازىلادى. سوعان قاراماستان، ءاربىر جارىستىڭ ماڭىزى زور. ارينە، وليمپياداعا بەرىلەتىن جولدامانى بارلىعىنان كۇتەمىز. ول ۋاقىتتا قاي بالۋان بابىندا بولادى؟ ۇپايدىڭ كىم كوپ جينايدى؟ سولار ءدۇبىرلى دوداعا باراتىن بولادى.
- جاستارعا قانداي ءۇمىت ارتاسىز؟
- وليمپياداعا باراتىن بالۋاندار قاتارىندا جاستارعا دە مۇمكىندىك بەرىلەدى. بارلىعى اركىمنىڭ دايىندىعىنا بايلانىستى عوي. جاستاردا سولاي ۇپاي جيناپ جاتسا، كەرەمەت بولادى.
ايتقانىمىزداي، الدا كوپتەگەن جارىستار كۇتىپ تۇر. ولاردىڭ اربىرىندە بالۋاندار شەبەرلىگىن جەتىلدىرەدى. سول ارقىلى تاجىريبەسىن ارتتىرادى. شاكىرتتەرىمە سونداي سەنىم ارتامىن.
- اڭگىمەڭىزگە راقمەت. قازاقستاندىق دزيۋدوشىلارعا ۇلكەن جەتىستىكتەر تىلەيمىز. الداعى جارىستاردا جوعارى جەتىستىكپەن ەلدى قۋانتا بەرىڭىزدەر دەمەكپىز.
- Cىزدەرگە دە راقمەت!