رادياسيالىق، حيميالىق جانە بيولوگيالىق قورعاۋ سالاسىنداعى ىنتىماقتاستىق ماسەلەلەرى تۋرالى ءسوز بولدى.
قازاقستان مەن تۇركيا اسكەريلەرى بۇگىنگى تاڭدا، ياعني پاندەميا كەزىندە وزەكتى بولىپ تابىلاتىن ىنتىماقتاستىقتىڭ تالاپتارىن تالقىلادى، دەپ حابارلايدى Almaty-akshamy.kz. ەكى مەملەكەت اسكەريلەرى وزەكتى ماسەلەنى بەينەكونفەرەنسيا بارىسىندا تالقىلاعان.
كەلىسسوزدەرگە قازاقستان تاراپىنان باس شتاب باستىعى – رادياسيالىق، حيميالىق جانە بيولوگيالىق قورعاۋ اسكەرلەرى دەپارتامەنتىنىڭ باستىعى، پودپولكوۆنيك ەرجان قۇلماعامبەتوۆ قاتىستى.
بۇگىنگى كۇنى بۇل باعىت مەملەكەتتەرىمىز ءۇشىن وتە وزەكتى بولىپ تابىلادى. ءبىزدىڭ پىكىرىمىز بويىنشا، وسى سالاداعى ىنتىماقتاستىقتى ۇيىمداستىرۋ ەكى ەلدىڭ قورعانىس قابىلەتىنىڭ جاي-كۇيىنە وڭ ىقپال ەتەدى، – دەپ اتاپ ءوتتى ول.
«پودپولكوۆنيك ەرجان قۇلماعامبەتوۆتىڭ ايتۋىنشا، بۇگىنگى كۇنى نەگىزگى باسىمدىق اسكەرلەردىڭ سوعىس ۋاقىتىندا دا، بەيبىت كەزەڭدە دە مىندەتتەردى ورىنداۋعا ءازىر بولۋىن ارتتىرۋ ماقساتىندا قازاقستان قارۋلى كۇشتەرىنىڭ رادياسيالىق، حيميالىق جانە بيولوگيالىق قورعاۋ جۇيەسىن دامىتۋ جانە جاڭعىرتۋ بولىپ تابىلادى.
تاراپتار مامانداردى دايارلاۋعا، بولىمشەلەردىڭ جاۋىنگەرلىك دايارلىعى پروسەسىنە جانە ولاردى تەحنيكالىق جاراقتاندىرۋعا قاتىستى ءوزارا ءىس-قيمىلدىڭ پەرسپەكتيۆالىق باعىتتارىن تالقىلادى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارىندا.
مامانداردىڭ ايتۋىنشا، رادياسيالىق، حيميالىق جانە بيولوگيالىق قورعاۋ – بۇل قازاقستان مەن تۇركيا قورعانىس ۆەدومستۆولارى اراسىنداعى ىنتىماقتاستىقتىڭ جاڭا باعىتى. ول زامان تالابىنا سايكەس دامىتۋدى قاجەت ەتەدى. رحبق اسكەرلەرىنىڭ قاجەت ەكەنىن كوروناۆيرۋستىق ينفەكسيا پاندەمياسى ايقىن كورسەتىپ بەردى. بۇل كەزەڭدە اسكەري قىزمەتشىلەر الەۋمەتتىك تۇرعىدان ماڭىزدى وبەكتىلەردى دەزينفەكسيالاۋ جونىندەگى مىندەتتەردى ورىندادى.
