قازاقستان مەن تاتارستاننىڭ ىنتىماقتاستىعى قارقىندى دامىپ كەلەدى

پرەزيدەنت قاسىم-جومارت توقايەۆ تاتارستان رايسى رۋستام ميننيحانوۆتى قابىلدادى، دەپ حابارلايدى Almaty-akshamy.kz akorda kz سىلتەمە جاساپ.

كەزدەسۋ بارىسىندا ساۋدا-ەكونوميكالىق، ينۆەستيسيالىق، اگرارلىق جانە مادەني-گۋمانيتارلىق سالالارداعى ىنتىماقتاستىقتى دامىتۋ پەرسپەكتيۆالارى تالقىلاندى.

مەملەكەت باسشىسى قازاقستانمەن اراداعى ەكونوميكالىق ىقپالداستىق اۋقىمى بويىنشا تاتارستان رەسەي وڭىرلەرى اراسىندا جەتەكشى ورىنعا يە ەكەنىن اتاپ ءوتتى.

– قازاقستان مەن تاتارستاننىڭ ىنتىماقتاستىعى قارقىندى دامىپ كەلەدى جانە رەسەي فەدەراسياسىمەن كوپجاقتى قارىم-قاتىناسىمىزدا ماڭىزدى ءرول اتقارادى دەپ ايتۋعا تولىقتاي نەگىز بار. وتكەن جىلدىڭ قورىتىندىسى بويىنشا قازاقستان مەن تاتارستان اراسىنداعى تاۋار اينالىمى 22،5 پايىزعا ءوسىپ، 597 ميلليون دوللاردان استى. ماشينا جاساۋ سالاسىندا «تاتنەفت»، «كاماز» كومپانيالارىنىڭ قاتىسۋىمەن ءىرى جوبالار تابىستى جۇزەگە اسىرىلىپ جاتىر. بۇدان دا بولەك جوبالار بار، – دەدى قاسىم-جومارت توقايەۆ.

ءوز كەزەگىندە رۋستام ميننيحانوۆ قازاقستان مەن تاتارستان اراسىنداعى ساۋدا-ەكونوميكالىق ىنتىماقتاستىقتى نىعايتۋ ماسەلەسىنە نازار اۋداردى.

– قۇرمەتتى پرەزيدەنت، كەزدەسۋگە ۋاقىت ءبولىپ، بىرلەسكەن جوبالار تۋرالى بايانداۋعا مۇمكىندىك بەرگەنىڭىز ءۇشىن سىزگە العىس ايتامىن. سونداي-اق بۇگىنگى «يننوپروم» كورمەسى ءۇشىن ريزاشىلىعىمدى بىلدىرەمىن. دايىندىق وتە جاقسى جۇرگىزىلگەن ءارى جوعارى دەڭگەيدە ءوتىپ جاتىر. ءبىز 100-دەن استام ادامنان جانە 38 كومپانيادان تۇراتىن ۇلكەن دەلەگاسيانى الا كەلدىك. ءبىزدىڭ مىندەتىمىز – ءىرى بيزنەستى تانىستىرىپ، ساۋدا-ەكونوميكالىق بايلانىستاردى نىعايتۋ عانا ەمەس، سونىمەن قاتار شاعىن جانە ورتا كاسىپورىندارىمىزدىڭ ءسىزدىڭ ەلىڭىزبەن بەلسەندى جۇمىس ىستەۋىنە سەپتىگىمىزدى تيگىزۋ، – دەدى تاتارستان رايسى.

كەزدەسۋ بارىسىندا مەملەكەت باسشىسى قازاقستان مەن رەسەيدىڭ ءوڭىرارالىق فورۋمى ءوزارا ىنتىماقتاستىق ءۇشىن وڭتايلى الاڭعا اينالعانىن اتاپ ءوتتى. بيىل قاراشا ايىندا قوستانايدا وتەتىن فورۋمنىڭ تاقىرىبى اۋىل شارۋاشىلىعىنا ارنالماق. پرەزيدەنت اۋىل شارۋاشىلىعى ونىمدەرىن وڭدەۋ ىسىندەگى مول تاجىريبە مەن وسى سالاداعى سەرىكتەستىك الەۋەتىنىڭ زور ەكەنىن ەسكەرە وتىرىپ، تاتارستان كاسىپكەرلەرى بۇل باعىتقا قىزىعۋشىلىق تانىتاتىنىنا سەنىم ءبىلدىردى.