ماماندار ارنايى شارتقا قول قويدى.
ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى اەروعارىش كوميتەتىنىڭ «رەسپۋبليكالىق عارىشتىق بايلانىس ورتالىعى» اق جانە تاجىكستاندىق «يساتەل» جشق «Kazsat-3» عارىش اپپاراتىنىڭ ترانسپوندەرلىك سىيىمدىلىعىن ۇسىنۋ بويىنشا قىزمەتتەردى كورسەتۋ تۋرالى شارتقا قول قويدى، دەپ حابارلايدى Almaty-akshamy.kz.
قۇجاتقا سايكەس، تاجىكستاندا قازاقستاندىق جەرسەرىكتىك بايلانىس رەسۋرستارى ارقىلى ەلىمىزدىڭ الىستا ورنالاسقان ەلدى مەكەندەرى ءۇشىن بايلانىس ارنالارى ۇيىمداستىرىلادى.
شارتقا «رەسپۋبليكالىق عارىشتىق بايلانىس ورتالىعى» اق باسقارما ءتوراعاسىنىڭ ورىنباسارى ۆاسيليي لەونوۆ پەن «يساتەل» جشق ديرەكتورى ۋمەد تاگويەۆ قول قويدى.
«يساتەل» جشق كومپانياسى «تەلەراديوكوم» ااق ەنشىلەس ۇيىمى جانە تاجىكستانداعى بايلانىس وپەراتورى بولىپ تابىلادى. ونىڭ دۋشانبە قالاسىندا ءوزىنىڭ تەلەپورتى جانە جەلىلىك باسقارۋ ستانسياسى بار، ەلدىڭ مەملەكەتتىك ورگاندارى مەن جەكە كومپانيالارى ءۇشىن ينتەرنەتكە قول جەتىمدىلىكتى قامتاماسىز ەتەدى.
«عارىشتىق بايلانىس سالاسىنداعى جاڭا حالىقارالىق شارتقا قول قويۋ «رەسپۋبليكالىق عارىشتىق بايلانىس ورتالىعى» اق ۇجىمىنىڭ كاسىبي جۇمىسىنىڭ ناتيجەسى بولىپ تابىلادى جانە قازاقستان رەسپۋبليكاسى مەن تاجىكستان اراسىنداعى ىنتىماقتاستىقتىڭ جاڭا دامۋ كەلەشەگىن اشادى»،- دەلىنگەن سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ باسپا ءسوز قىزمەتىنىڭ حاباراماسىندا.
قازاقستاننىڭ جەرسەرىكتىك بايلانىس جۇيەسى ەلىمىزدىڭ بايلانىس قىزمەتتەرى قاجەتتىلىگىن تولىعىمەن قامتاماسىز ەتەدى، «رەسپۋبليكالىق عارىشتىق بايلانىس ورتالىعى» اق قىرعىز رەسپۋبليكاسىنا دا عارىشتىق بايلانىس ونىمدەرىن جەتكىزەدى.
ايتا كەتسەك، سيفرلىق يندۋستريا قىزمەتتەرىنىڭ ەكسپورتىن ۇلعايتۋ مىندەتىن ەل پرەزيدەنتى قازاقستان حالقىنا جولداۋىندا مەملەكەت ەكونوميكاسىن دامىتۋدىڭ قۇرامداس بولىكتەرىنىڭ ءبىرى رەتىندە اتاپ وتكەن ەدى.