ەلارالىق كەلىسىم جاسالىپ جاتىر.
قازاقستان مەن سينگاپۋر اراسىندا تىكەلەي اۋە قاتىناسىن اشۋ بويىنشا كەلىسسوزدەر جۇرگىزىلدى، دەپ حابارلايدى Almaty-akshamy.kz
ۇشۋ گەوگرافياسىن كەڭەيتۋ جانە حالىقارالىق رەيستەردى ۇلعايتۋ شەڭبەرىندە قازاقستان مەن سينگاپۋر اراسىندا تىكەلەي اۋە قاتىناسىن اشۋ بويىنشا جۇمىس جۇرگىزىلىپ جاتىر. وسىلايشا، قازاقستان مەن سينگاپۋردىڭ اۆياسيالىق بيلىك ورگاندارى بەينە-كونفەرەنس بايلانىس ارقىلى كەلىسسوزدەر جۇرگىزدى.
قازاقستاندىق دەلەگاسيانى ق ر ييدم ازاماتتىق اۆياسيا كوميتەتىنىڭ ءتوراعاسى تالعات لاستايەۆ، سينگاپۋر دەلەگاسياسىن ازاماتتىق اۆياسيا باسقارماسىنىڭ باس ديرەكتورى حان كوك حۋان باسقاردى.
كەلىسسوزدەر بارىسىندا قازاقستاندىق تاراپ تىكەلەي رەيستەرگە قىزىعۋشىلىق تانىتىپ، سينگاپۋرلىق اۋە كومپانيالارعا قازاقستانداعى «اشىق اسپان» رەجيمىن، ونىڭ ىشىندە اۋە ەركىندىگىنىڭ «بەسىنشى دارەجەسى» قۇقىعىن پايدالانۋدى ۇسىندى. سينگاپۋرلىق تاراپ «اشىق اسپان» رەجيمىن قۇپتاپ، بۇل ۇسىنىس ءوز اۋە كومپانيالارىمەن پىسىقتالاتىنىن حابارلادى.
تاراپتار 2023 جىلعى شىلدەدە سينگاپۋرلىق اۋە كومپانيالار مەن «سينگاپۋر-چانگي اۋەجايىنىڭ» قاتىسۋىمەن وتەتىن كەزدەسۋ شەڭبەرىندە اۋە قاتىناسىن اشۋ ماسەلەلەرىن تالقىلاۋدى جالعاستىرۋعا كەلىستى. بۇل رەتتە سينگاپۋر تاراپى وزدەرىنىڭ ازاماتتىق اۆياسيا اكادەمياسىندا وقۋدان ءوتۋ مۇمكىندىگىن حابارلادى. سونداي-اق قازاقستاندىق تاراپ «ەير استانا» اۋە كومپانياسىنىڭ ەلدەر اراسىنداعى ۇشۋلاردى ورىنداۋدى باستاۋ جوسپارىن قۇپتادى.