تاۋار اينالىمى $51 ملرد-تى قۇرادى.
پرەمەر-مينيستر ءاليحان سمايىلوۆ ونلاين رەجيمدە وتكەن شانحاي ىنتىماقتاستىعى ۇيىمىنا مۇشە مەملەكەتتەردىڭ ۇكىمەت باسشىلارى كەڭەسىنىڭ كەزەكتى وتىرىسىندا ءسوز سويلەدى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
شىۇ اياسىنداعى كوپجاقتى ءوزارا ءىس-قيمىل قازاقستان ۇكىمەتى جۇمىسىنىڭ باسىمدىقتارىنىڭ ءبىرى بولىپ قالا بەرەدى.
پاندەميا مەن باسقا دا سىن-قاتەرلەرگە قاراماستان، شىۇ كەڭىستىگىندە دامۋدىڭ ايتارلىقتاي جوعارى ديناميكاسى ساقتالىپ وتىر. ماسەلەن، وتكەن جىلدىڭ قورىتىندىسى بويىنشا ۇيىمعا مۇشە مەملەكەتتەردىڭ ەكونوميكالىق ءوسۋ قارقىنى 4-تەن 9%-عا دەيىن ۇلعايدى، ال قازاقستان مەن شىۇ ەلدەرى اراسىنداعى جيىنتىق تاۋار اينالىمى 22%-عا ءوسىپ، $51 ملرد-تى قۇرادى.
«ءاليحان سمايىلوۆ ازىق-تۇلىك قاۋىپسىزدىگىن قامتاماسىز ەتۋ بويىنشا ۇيلەستىرىلگەن شارالار قابىلداۋدىڭ ماڭىزدىلىعىن اتاپ ءوتتى. «قازاقستان ءوزىنىڭ اۋىل شارۋاشىلىعى الەۋەتىن پايدالانا وتىرىپ، بۇل ىسكە ۇلەس قوسۋعا دايىن. مۇندا ماڭىزدى قادام سەلەكسيا جانە تۇقىم شارۋاشىلىعى سالاسىنداعى ىنتىماقتاستىق باعدارلاماسىن ازىرلەۋ بولادى. بۇل اۋىل شارۋاشىلىعىنىڭ دامۋىنا سەرپىن بەرىپ، مەملەكەتتەرىمىزدىڭ عىلىمي سەلەكسيالىق ورتالىقتارىن كووپەراسيالاۋعا جول اشادى جانە ازىق-تۇلىك قاۋىپسىزدىگىن قامتاماسىز ەتۋگە وڭ اسەر ەتەدى»، - دەدى ءاليحان سمايىلوۆ.
سونىمەن قاتار پرەمەر-مينيستر كۇش-جىگەردى بىرىكتىرىپ، پەرسپەكتيۆاسى بار كولىك-ترانزيت دالىزدەرىن دامىتۋعا شاقىردى.
«اقتاۋ پورتىنىڭ» ءۇندىستان – پارسى شىعاناعى ەلدەرى – يران – قازاقستان – رەسەي» باعىتىنداعى توراپقا اينالۋعا الەۋەتى زور. قازىرگى جاعدايدا ترانسكاسپيي كولىك ءدالىزىنىڭ ەۋروپا، ورتالىق ازيا جانە جۇڭگو اراسىنداعى ترانزيتتىك اعىنداردى قامتاماسىز ەتۋدەگى ءرولى دە ارتىپ كەلەدى. وسى باعىتتىڭ مۇمكىندىكتەرىن بىرلەسىپ ىسكە اسىرۋ جۇكتەردىڭ تۇراقتى كولەمىنىڭ بولۋى مەن ۇزدىكسىز تاسىمال كولەمىن قامتاماسىز ەتەدى»، - دەدى ول.