كەزدەسۋ بارىسىندا تاراپتار ازياداعى كوپجاقتى فورماتتاعى قازاقستان-رەسەي ىنتىماقتاستىعىنىڭ جاي-كۇيى مەن دامۋى تۋرالى پىكىر الماستى.
قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ءادىل تۇرسىنوۆ رەسەي فەدەراسياسىنا جۇمىس ساپارى اياسىندا رەسەي سىرتقى ىستەر ءمينيسترىنىڭ ورىنباسارى يگور مورگۋلوۆپەن كەزدەستى، دەپ حابارلايدى Almaty-akshamy.kz ءسىم باسپا ءسوز قىزمەتىنە سىلتەمە جاساپ.
تاراپتار ازياداعى ءوزارا ىقپالداستىق جانە سەنىم شارالارى جونىندەگى كەڭەس (اوسشك) شەڭبەرىندەگى ەكى ەلدىڭ قارىم-قاتىناس ماسەلەلەرىنە ەرەكشە نازار اۋداردى. ازيا كەڭەسىندەگى قازاقستاندىق تاراپتىڭ قازىرگى ءتوراعالىعىن ەسكەرە وتىرىپ، ءا. تۇرسىنوۆ رەسەيلىك ديپلوماتتى 2022 جىلعى قازاندا وتەتىن اوسشك 6-شى سامميتىنە دايىندىق بارىسى، ونىڭ ىشىندە ءىس-شارانىڭ كۇن ءتارتىبى، ونىڭ مازمۇندىق جانە ۇيىمداستىرۋشىلىق اسپەكتىلەرى تۋرالى حاباردار ەتتى.
رەسەي تاراپى فورۋم قىزمەتىن جانداندىرۋ بويىنشا قازاقستان توراعالىعىمەن جۇرگىزىپ جاتقان جۇمىستى جوعارى باعالاپ، ازيا كەڭەسىن حالىقارالىق ۇيىمعا اينالدىرۋدى قولدايتىنىن ءبىلدىردى.
سونىمەن قاتار، تاراپتار اوسشك اياسىنداعى ءىس-شارالار كەستەسىن تالقىلادى.
كەلىسسوزدەر قورىتىندىسى بويىنشا ديپلوماتتار اوسشك 6-شى ءسامميتىن تابىستى وتكىزۋ، سونداي-اق ازياداعى كوپجاقتى فورماتتاعى ەكى ەل اراسىنداعى ىنتىماقتاستىعىن نىعايتۋ ماقساتىندا بەلسەندى بايلانىستاردى جالعاستىرۋعا كەلىستى.