جۇڭگو حالىق رەسپۋبليكاسىمەن شەتەلدىك رۇقسات بلانكىسىن الماسۋ بۇدان بىلاي ەلەكتروندى فورماتتا جۇزەگە اسادى، دەپ حابارلايدى aqshamnews.kz.
بۇل تۋرالى ق ر كولىك مينيسترلىگىنىڭ اۆتوموبيل كولىگى جانە كولىكتىك باقىلاۋ كوميتەتى حابارلادى.
شەتەلدىك رۇقسات بلانكىسى (شرب) - تاسىمالداۋشىلارعا جۇكپەن شەتەلگە شىعۋعا مۇمكىندىك بەرەتىن ارنايى قۇجات.
بيىلعى جىلدىڭ 26 قاراشاسىنان 27 قاراشاسىنا قاراعان ءتۇنى سىناق رەجيمىندە العاشقى جۇك كولىك قۇرالدارى وتكىزىلدى. ءساتتى تەستىلەۋدەن كەيىن ەلەكتروندى جۇيە رەسمي تۇردە ەنگىزىلدى.
وسى جىلدىڭ باسىنان بەرى جۇڭگو تاراپىمەن 190 000 بىرلىك كولەمىندە جۇكتەردى تاسىمالداۋعا ارنالعان رۇقسات بلانكىلەرىمەن الماسۋ جۇرگىزىلدى. بۇل — رەكوردتىق كورسەتكىش. ەكى ەلدىڭ جاۋاپتى ۆەدومستۆولارى قوسىمشا 40 مىڭ بىرلىك كولەمىندەگى شەتەلدىك رۇقسات بلانكىلەرىن الماسۋ بويىنشا كەلىسسوزدەر جۇرگىزدى. ونىڭ 30 مىڭى ەلەكتروندى فورماتتاعى جاڭا جۇيەنى قولدانۋ ارقىلى جۇزەگە اسسا، ال قالعان قوسىمشا 10 مىڭ دانا قاعاز جۇزىندە بولدى. شەتەلدىك رۇقسات بلانكىسىن الماسۋ 29 قاراشادا جۇزەگە استى.
ەستەرىڭىزگە سالا كەتەيىك، سوڭعى ەكى جىلدا قحر-مەن شەتەلدىك رۇقسات قۇجاتتارىمەن الماسۋ 50 مىڭنان 230 مىڭعا دەيىن ءوستى.
جالپى، قازاقستاندىق تاسىمالداۋشىلاردىڭ حالىقارالىق اۆتوتاسىمالدارعا قاتىسۋ كورسەتكىشى 31% - دان (2021) 52% - عا (2023) دەيىن ءوستى. بۇگىنگى تاڭدا قازاقستان الەمنىڭ 42 ەلىمەن شەتەلدىك رۇقسات بلانكىلەرىن الماسۋدى جۇزەگە اسىرادى. بيىلعى كورسەتكىش — 364 705 دانا شەتەلدىك رۇقسات بلانكىسى. بۇل دا رەكوردتىق كورسەتكىش.
ەلەكتروندى فورماتتاعى بلانكىلەردى ەنگىزۋدىڭ نەگىزى مەملەكەت باسشىسىنىڭ 2023 جىلعى مامىر ايىندا سيان قالاسىنا جۇمىس ساپارى اياسىندا قول قويىلعان قۇجاتتان باستاۋ الادى. ال ەلەكتروندى فورماتقا كوشۋدىڭ ناقتى ۋاقىتى بيىلعى قىركۇيەكتە ورىن العان پرەمەر-مينيستردىڭ شانحايعا ءىس-ساپارى اياسىندا قىتايلىق ارىپتەسىمەن كەزدەسۋ بارىسىندا بەكىتىلدى.
ەلەكتروندى بلانكىلەردى ەنگىزۋ جۇك تاسىمالداۋ پروسەسىن بارىنشا جەڭىلدەتىپ، ادامي فاكتور مەن سىبايلاس جەمقورلىق تاۋەكەلدەرىن جويادى.