قازاقستاننىڭ تاۋار اينالىمى قۇرىلىمىنداعى قىتايدىڭ ۇلەسى 16،1 پايىزدى قۇرادى.
اعىمداعى جىلدىڭ قاڭتار ايىندا قازاقستان مەن جۇڭگو اراسىنداعى تاۋار اينالىمى 1،4 ملرد دوللارعا جەتتى، بۇل ءبىر جىل بۇرىنعىدان 53،4%-عا ارتىق، دەپ حابارلايدى Almaty-akshamy.kz Finprom.kz سايتىنا سىلتەمە جاساپ.
بيىلعى جىلدىڭ العاشقى ايىندا قىتايعا جاسالعان ەكسپورت كولەمى يمپورت كولەمىنەن اسىپ ءتۇستى. ەكسپورت بىردەن 77،9%-عا ءوسىپ، 771،7 ملن اقش دوللارىنا جەتتى. قازاقستان رەسپۋبليكاسىنان ەكسپورتتىڭ جالپى كولەمىندەگى قىتايدىڭ ۇلەسى 12،7%-دى قۇرادى.
ال يمپورت ءوز كەزەگىندە 31،8%-عا ءوسىپ، 648،5 ملن. قازاقستان رەسپۋبليكاسىنا يمپورتتىڭ جالپى كولەمىندەگى قىتايدىڭ ۇلەسى 23،8%-دى قۇرادى.
2021 جىلعى 1 قازانداعى جاعداي بويىنشا، قازاقستان رەزيدەنتتەرىنىڭ قىتايدان كەلگەن ينۆەستورلار الدىنداعى مىندەتتەمەلەرى 13،5 ملرد دوللاردى قۇرادى، بۇل ءبىر جىل بۇرىنعىدان 0،4%-عا ارتىق. ەكى جىلدىق قۇلدىراۋدان كەيىن يندەكس ءسال كوتەرىلدى.
قاراجاتتىڭ باسىم بولىگىن قىتايلىق ينۆەستورلار قازاقستان رەسپۋبليكاسىنىڭ وڭدەۋ ونەركاسىبىنە باعىتتادى: 2021 جىلدىڭ قازانىنا دەيىن 2،8 ملرد دوللار بولدى، بۇل ءبىر جىلدا 2،2%-عا ارتىق دەگەن ءسوز.
سونداي-اق تانىمال سالالارعا كولىك پەن قويما (2،6 ملرد دوللار، ءبىر جىلمەن سالىستىرعاندا 21،5%-عا از) جانە ساۋدا مەن اۆتوكولىك جوندەۋ (2،1 ملرد دوللار، 20،3%-عا ءوستى) كىرەدى.
2021 جىلدىڭ قاڭتار-قىركۇيەك ايلارىندا قىتايدان كەلگەن ينۆەستورلاردىڭ جالپى تىكەلەي ينۆەستيسيا اعىنى 1،5 ميلليارد دوللارعا جەتتى، بۇل ءبىر جىل بۇرىنعىدان 2،9 ەسەگە كوپ.
سالىستىرۋ ءۇشىن: 2020 جىلدىڭ وسى كەزەڭىندە جۇڭگو ينۆەستيسياسىنىڭ جالپى اعىنى ءبىر جىلدا بىردەن 57،7%-عا قىسقارىپ، 521،8 ملن دوللارعا دەيىن ازايعان.
2022 جىلدىڭ 1 ناۋرىزىنا دەيىن ەلدە قىتايدىڭ قاتىسۋىمەن 1،5 مىڭ كومپانيا جۇمىس ىستەدى، بۇل ءبىر جىل بۇرىنعىدان 17،4%-عا ارتىق.
بۇل كومپانيالاردىڭ باسىم بولىگى كوتەرمە جانە بولشەك ساۋدا مەن اۆتوجوندەۋ، قۇرىلىس پەن تاۋ-كەن ءوندىرۋ سالالارىندا جۇمىس ىستەيدى. ۇزدىك بەستىككە ەنگەن سالاعا سونىمەن قاتار وڭدەۋ ونەركاسىبى مەن كاسىبي، عىلىمي-تەحنيكالىق قىزمەت تە كىرەدى.
