ەلىمىز تاۋەلسىزدىك العالى قازاقستان مەن جۇڭگو اراسىنداعى ساۋدا-ساتتىق 60 ەسەگە ارتتى
1992 جىلى ءوزارا الىس-بەرىستى 368 ملن دوللاردان باستاعان تاراپتاردىڭ بىلتىرعى جىل قورىتىندىسى بويىنشا تاۋاراينالىم كولەمى 23 ملرد دوللارعا جۋىقتاعان. مۇنداي دەرەكتەر 2022 جىلدىڭ العاشقى كۇندەرى جاريالانعان ەلىمىزدەگى قىتايدىڭ توتەنشە جانە وكىلەتتى ەلشىسى چجان سياونىڭ «قىتاي-قازاقستان دوستىعى – ەكى حالىقتىڭ باعا جەتپەس بايلىعى» اتتى ماقالاسىندا كەلتىرىلگەن، دەپ حابارلايدى Almaty-akshamy.kz
سونداي-اق وندا اسپاناستى ەلى ءبىزدىڭ ەكونوميكامىزعا 2020 جىلدىڭ سوڭىنا دەيىن ەسەپتەگەننىڭ وزىندە 21 ملرد دوللاردان استام ينۆەستيسيا قۇيعانى ايتىلعان. بۇل قارجى ءوندىرىس، اۋىل شارۋاشىلىعى، ەنەرگەتيكا، كولىك سالالارى جانە «جاسىل» ەكونوميكا باعىتىنداعى جوبالاردى قولداۋعا جۇمسالعان. قوس ەل اراسىندا 5 ترانسشەكارالىق مۇناي-گاز قۇبىرى، ەكى شەكارالىق تەمىرجول جەلىسى قۇرىلعان. قازاقستان جۇڭگو ارقىلى تىنىق مۇحيتقا جول اشتى. ەكى مەملەكەت تە ازيا مەن ەۋروپانى بايلانىستىرۋشى ماڭىزدى توراپقا اينالدى. ءتيىمدى ارىپتەستىكتىڭ اياسىندا حالىقارالىق الاڭدا ەلدەرىمىزدىڭ بەدەلى اسىپ، جاڭا نارىقتار باعىندىرىلىپ جاتىر.
«دوللارلىق ماندە ەكسپورت پەن يمپورت كولەمى 6 ترلن 50 ملرد-تى قۇرادى. 2013 جىلى بۇل كورسەتكىش العاش رەت 4 ترلن دوللارعا جەتسە، 8 جىلدان كەيىن ءبىر جىلدىڭ ىشىندە ەكى رەت جاڭا تاريحي بيىككە شىقتى»، - دەدى قحر باس كەدەن باسقارماسى ستاتيستيكا جانە تالداۋ دەپارتامەنتىنىڭ ديرەكتورى لي كۋيۆەن.
«الەمدە ءورشىپ جاتقان پاندەميا جاعدايىندا قىتايدىڭ سىرتقى ساۋداسى ساندىق، ساپالىق جاعىنان جاقسارۋىن جالعاستىردى. 13 جىل قاتارىنان جۇڭگو – الەمدەگى ەڭ ءىرى ەكسپورتتاۋشى. سونداي-اق ءبىز كۇتكەن ناتيجەلەردەن الدەقايدا اسىپ ءتۇستى، 14ء-شى بەسجىلدىقتىڭ جاقسى باستاۋى بولاتىن كورسەتكىشتەرگە قول جەتكىزدىك»، - دەدى قحر مەملەكەتتىك اقپارات ورتالىعى بولجاۋ ءبولىمىنىڭ ماكروەكونوميكالىق زەرتتەۋلەر زەرتحاناسىنىڭ ديرەكتورى يان مين.