ۆيزاسىز رەجيم قازاقستان مەن جۇڭگو اراسىنداعى قارىم-قاتىناستى جاڭا دەڭگەيگە كوتەرەدى. شانحايعا جۇمىس ساپارى بارىسىندا ەل پرەمەر-مينيسترى ءاليحان سمايىلوۆ جۇڭگو حالىق رەسپۋبليكاسىنىڭ مەملەكەتتىك كەڭەسىنىڭ پرەمەرى لي سيانمەن كەزدەسۋ وتكىزىپ، وندا ەكى ەل اراسىنداعى ساۋدا-ەكونوميكالىق ىنتىماقتاستىقتىڭ وزەكتى ماسەلەلەرى تالقىلاندى، دەپ حابارلايدى اlmaty-akshamy.kz qazaqstan.tv-گە سىلتەمە جاساپ.
جۇڭگو – قازاقستاننىڭ ءىرى ساۋدا سەرىكتەستەرىنىڭ ءبىرى. ماسەلەن وتكەن جىلى ەكى ەل اراسىندا تاۋار اينالىمى 35 پايىزعا ارتىپ، رەكوردتىق 24،2 ملرد دوللارعا جەتتى. بيىل دا قارقىندى ءوسىم جالعاسۋدا: وتكەن ايلاردا ءوزارا ساۋدا اينالىمى تاعى 21 پايىزعا ءوستى. بۇگىندە قازاقستان ەكونوميكاسىنا تارتىلعان ينۆەستيسيا بويىنشا جۇڭگو توپ–5 ينۆەستور قاتارىنا كىرەدى. سوڭعى 18 جىلدا قىتايدان تارتىلعان ينۆەستيسيالاردىڭ جالپى كولەمى 24 ملرد دوللارعا جەتتى.
لي سيان، قحر مەملەكەتتىك كەڭەسىنىڭ پرەمەرى:
مەملەكەتتەرىمىزدىڭ باسشىلارى قارىم-قاتىناسىمىزدى ودان ءارى دامىتۋدىڭ باسىم مىندەتتەرى مەن باعىتتارىن بەلگىلەدى. ءبىز قازاقستاندىق ارىپتەستەرىمىزبەن وسى جوعارى دەڭگەيدەگى كەلىسىمدەردى ءىس جۇزىندە جۇزەگە اسىرۋ ءۇشىن كۇش-جىگەر جۇمساۋعا دايىنبىز. مۇنداي ىنتىماقتاستىق ءبىزدىڭ حالقىمىزدىڭ ءومىر ءسۇرۋ دەڭگەيىنە وڭ اسەر ەتەدى.