قازاقستان مەن وزبەكستاندى بايلانىستىراتىن شەكارا بەكەتتەرى اشىلدى

ءبىر كۇندە شەكارا بەكەتتەرىنەن 300-دەن استام ادام بارىس-كەلىس جاساعان.

ماقتاارال اۋدانىندا قازاقستان مەن وزبەكستان رەسپۋبليكالارىن بايلانىستىراتىن «سىرداريا» جانە «سەلينىي» شەكارا بەكەتتەرى قايتا اشىلدى، دەپ حابارلايدى Almaty-akshamy.kz Egemen.kz cىلتەمە جاساپ.

اشىلعان كۇنى شەكارا بەكەتتەرىنەن 300-دەن استام ادام بارىس-كەلىس جاساعان. كۇنى كەشە اۋدان اكىمى باقىت اسانوۆ بەكەتتەردىڭ جۇمىس بارىسىن قاداعالاپ، جاعدايىمەن ارنايى تانىستى.

م-39 «تاشكەنت-تەرمەز» ءدالىزىنىڭ بويىندا ورنالاسقان شەكارا بەكەتتەرىن الداعى ۋاقىتتا تولىق ينفراقۇرىلىممەن قامتاماسىز ەتۋ جوسپارلانىپ وتىرعانىن اۋدان باسشىسى اتاپ ءوتتى.

اتاپ ايتقاندا، شەكارا ماڭىنان ساۋدا لوگيستيكالىق ورتالىقتارىن قۇرۋ، ونىڭ ىشىندە ساۋدا بازارلارى، قوناق ءۇي، اۆتوتۇراق، قويمالار سالۋ كوزدەلىپ وتىر.

سونداي-اق شەكارا بەكەتتەرىنىڭ ايماعىنا كورىكتەندىرۋ، كوگالداندىرۋ جۇمىستارى جۇرگىزىلىپ، كەڭەيتۋ جوسپارى جاسالاتىن بولادى.

«قازىرگى تاڭدا اتاكەنت كەنتىنىڭ ماڭىنداعى «اتامەكەن» كەدەندىك بەكەتىن «سەليننىي» شەكارا بەكەتىنە كوشىرۋ ماسەلەسى دە كۇن تارتىبىندە تۇر. كورشى ەلگە وتپەكشى بولعان جۇك كولىكتەرى كەدەندىك بەكەت ماڭىندا كەپتەلىسكە ۇشىراپ، اتاكەنت كەنتىندە جول قاتىناسىن قيىنداتا ءتۇستى. ماسەلەنىڭ بىردەن ءبىر شەشىمى - كەدەندىك بەكەتتى كوشىرۋ»، - دەدى باقىت ناسىرحان ۇلى.

ايتا كەتەيىك، اۋدان اكىمى سالا باسشىلارىنا «م-39» حالىقارالىق ءدالىزىن جوندەۋدەن وتكىزىپ، قالپىنا كەلتىرۋ ءۇشىن ۇسىنىس حات دايىنداۋعا دا ارنايى تاپسىرما بەردى.