قازاقستاننان پاراشيۋتتىك دايارلىق ورتالىعىنىڭ ماماندارىنان بارلىعى 60 اسكەري قىزمەتشى جۇمىلدىرىلدى
تاشكەنت وبلىسىنداعى «انگرەن» تاۋلى پوليگونىندا وتكەن جاتتىعۋدىڭ بەلسەندى كەزەڭىن قورعانىس ءمينيسترى گەنەرال-پولكوۆنيك رۋسلان جاقسىلىقوۆ باقىلادى، دەپ حابارلايدى Almaty-akshamy.kz.
«قالقان-2023» تاكتيكالىق-ارنايى وقۋ-جاتتىعۋىنا بىرلەسكەن جەدەل شتاب باسشىلىق ەتتى.
وقۋ-جاتتىعۋدىڭ جوسپارى بويىنشا مەملەكەتتەردىڭ ءبىرىنىڭ اۋماعىندا قونىستانعان زاڭسىز قارۋلى قۇرىلىمدار وزدەرىنىڭ ىقپال ەتەتىن ايماقتارىن كەڭەيتۋگە تىرىسادى.
ەسىرتكىمەن زاڭسىز اينالىساتىن توپتاردىڭ قارۋلى قاقتىعىسى شيەلەنىستىڭ ودان ءارى ورشۋىنە اكەلەدى. ەسىرتكى ترافيگىنىڭ باعىتتارىن قامتاماسىز ەتۋ ماقساتىندا كورشىلەس ەلدىڭ بيىك تاۋلى ايماقتارىندا تىرەك بازالارىن، قارۋ-جاراق پەن وق-دارىلەر سالىنعان جاسىرىن جەرلەردى قۇرۋ ارەكەتتەرى بايقالادى. دەسترۋكتيۆتى كۇشتەر انگرەن باعىتىندا ەرەكشە بەلسەندىلىك تانىتادى. شەكارا ناريادتارىنا وق جاۋدىرادى.
قارقىندىلىعى تومەن قاقتىعىس دەگەن سيپاتتاعى احۋالدا قازاقستان مەن وزبەكستاننىڭ ارنايى ماقساتتاعى بىرىككەن جاساعى اسكەري وكرۋگتىڭ جالپى اسكەري بولىمشەلەرىمەن ءوزارا ءىس-قيمىل جاساي وتىرىپ، شەكارا ماڭىنداعى اۋداندارداعى زاڭسىز قارۋلى قۇرالىمداردى انىقتاۋ جانە ولاردى جويۋ جونىندە ارنايى وپەراسيا جۇرگىزدى.
تاكتيكالىق-ارنايى وقۋ-جاتتىعۋ بارىسىندا مەملەكەتتىك شەكارانى قورعاۋدى نىعايتۋ جۇزەگە اسىرىلدى، شەكارا بەلدەۋىندەگى قارسىلاستىڭ شاعىن توپتارىن جويۋ بويىنشا قوس مەرگەننىڭ ءىس-قيمىلى پىسىقتالدى. ال نەگىزگى بولىمشەلەردى قولدانۋ ايماقتارىنا جىلجىتۋدى بارلاۋ قىزمەتى قامتاماسىز ەتتى.
جاۋدىڭ نەگىزگى كۇشتەرىن جويۋعا باعىتتالعان باتالوندىق تاكتيكالىق توپتاردى قولداۋ ءۇشىن اۋە جانە ارتيللەريالىق سوققىلار جاسالدى. بۇل رەتتە رەزەرۆتەگى كۇشتەر مەن قۇرالدارىن ۇرىسقا قولدانۋ دا سىنالدى. وپەراسيا سوڭىندا باتالوندىق تاكتيكالىق توپتاردىڭ بولىمشەلەرى مەن توسقاۋىلداعى جاساقتى قورعانىس ايماعىنان شىعارۋ جۇزەگە اسىرىلدى.
قازاقستان تاراپىنان وقۋ-جاتتىعۋعا ارميا جانە اسكەري-كولىكتىك اۆياسيا بولىمشەلەرىنەن، پاراشيۋتتىك دايارلىق ورتالىعىنىڭ ماماندارىنان بارلىعى 60 اسكەري قىزمەتشى جۇمىلدىرىلدى.
«قالقان-2023» بىرلەسكەن تاكتيكالىق-ارنايى وقۋ-جاتتىعۋى بىرلەسكەن وپەراسياعا دايىندالۋ جانە ونى وتكىزۋ كەزىندە باسقارۋ ورگاندارى جۇمىسىنىڭ ءبىرىڭعاي الگوريتمىن ازىرلەۋگە، قازاقستان مەن وزبەكستان قارۋلى كۇشتەرى بولىمشەلەرىنىڭ بىرلەسكەن قارىم-قاتىناسى بارىسىندا ءوزارا ءىس-قيمىل ماسەلەلەرىن پىسىقتاۋعا باعىتتالعان.
گەنەرال-پولكوۆنيك رۋسلان جاقسىلىقوۆ وقۋ-جاتتىعۋ سوڭىندا گەنەرال-لەيتەنانت باحودير قۇربانوۆپەن بىرگە وزبەكستان قارۋلى كۇشتەرىنىڭ اكادەمياسىنا باردى. جوعارى وقۋ ورنىنىڭ قىزمەتىمەن تانىسۋ بارىسىندا ول قازاقستان قارۋلى كۇشتەرىنىڭ تاقىرىپتىق سىنىبىنىڭ اشىلۋ سالتاناتىنا قاتىسىپ، اكادەميانىڭ قۇرمەتتى قوناقتارى كىتابىنا قولتاڭباسىن قالدىردى.