وزەكتى ماسەلەلەردى تالقىلادى.
پرەزيدەنت قاسىم-جومارت توقايەۆتى حالىقارالىق كونگرەسس ورتالىعىندا رەسمي قارسى الۋ ءراسىمى ءوتتى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
قۇرمەت قاراۋىلىنىڭ باستىعى ەكى ەل باسشىلارىنا راپورت بەرىپ، قازاقستان مەن وزبەكستاننىڭ ءانۇراندارى ورىندالعاننان كەيىن قاسىم-جومارت توقايەۆ پەن شاۆكات ميرزيويەۆ بىر-بىرىنە رەسمي دەلەگاسيالاردىڭ قۇرامىن تانىستىردى.
بۇدان سوڭ مەملەكەتتەر باسشىلارى شاعىن قۇرامدا كەلىسسوز جۇرگىزدى. قازاقستان پرەزيدەنتى قوناقجايلىق كورسەتىپ قارسى العان شاۆكات ميرزيويەۆكە ريزاشىلىعىن ءبىلدىرىپ، مەملەكەتتىك ساپاردىڭ ماڭىزدىلىعىن اتاپ ءوتتى.
«ءبىز وزبەكستانمەن ىنتىماقتاستىقتى ودان ءارى نىعايتۋعا مۇددەلىمىز. قازاق پەن وزبەك – ەجەلدەن دوستىعى مىزعىماس، سىيلاستىعى جاراسقان باۋىرلاس حالىقتار. ەكى ەلدىڭ ءسالت-داستۇرى، مادەنيەتى، ءتىلى، ءدىنى ۇقساس. تاريحى تامىرلاس، تاعدىرلاس ەلدەرىمىزدىڭ ماقسات-مۇراتى دا ورتاق. سوندىقتان مەن بۇگىنگى ساپارعا ايرىقشا ءمان بەرەمىن. ءبىز تاتۋ كورشىلىككە جانە سەنىمدى سەرىكتەستىككە نەگىزدەلگەن قارىم-قاتىناستى جاڭا دەڭگەيگە كوتەرەمىز دەپ سەنەمىن. قازاقستان مەن وزبەكستان اراسىنداعى ىنتىماقتاستىق نەعۇرلىم تىعىز جانە تابىستى بولسا، ورتالىق ازياداعى احۋال سوعۇرلىم تۇراقتى بولادى»، – دەدى قاسىم-جومارت توقايەۆ.
سونىمەن قاتار مەملەكەت باسشىسى وزبەكستان پرەزيدەنتىنىڭ جولداۋىمەن تانىسقانىن جانە بۇل ماڭىزدى قۇجات وزبەكستاننىڭ ودان ءارى تابىستى دامۋىنا جول اشاتىنىن جەتكىزدى.
شاۆكات ميرزيويەۆ ءوز كەزەگىندە قازاقستان پرەزيدەنتىن سايلاۋداعى جەڭىسىمەن قۇتتىقتاپ، وزبەكستانعا مەملەكەتتىك ساپارمەن كەلۋ تۋرالى شاقىرۋىن قابىل العانى ءۇشىن ريزاشىلىعىن ءبىلدىردى. وزبەكستان پرەزيدەنتىنىڭ ايتۋىنشا، قاسىم-جومارت توقايەۆتىڭ بۇل ساپارى ەكى ەل قارىم-قاتىناستارىنىڭ دامۋىنا تىڭ سەرپىن بەرىپ، قول قويىلاتىن قۇجاتتار ناقتى ىس-ارەكەتتەرگە بەرىك نەگىز بولادى.
پرەزيدەنتتەر ساياسي، ساۋدا-ەكونوميكالىق جانە مادەني-گۋمانيتارلىق سالالاردى كەڭەيتۋگە كوڭىل ءبولىپ، قازاق-وزبەك ستراتەگيالىق سەرىكتەستىگىنىڭ اۋقىمدى ماسەلەلەرىن تالقىلادى. اتاپ ايتقاندا، ەكى ەل – ورتالىق ازياداعى ەڭ ءىرى ساۋدا سەرىكتەستەر. بيىل ساۋدا اينالىمى 35 پايىزعا ءوسىپ، 5 ميلليارد دوللارعا جۋىقتادى. مۇنداي كورسەتكىشكە ونەركاسىپ، ماشينا جاساۋ، لوگيستيكا، كولىك، ەنەرگەتيكا جانە باسقا دا سالالاردا بىرلەسكەن جوبالاردى جۇزەگە اسىرۋ ارقىلى قول جەتكىزىلگەنىنە نازار اۋدارىلدى.
سونداي-اق تاراپتار جاھاندىق جانە ايماقتىق كۇن تارتىبىندەگى وزەكتى ماسەلەلەردى تالقىلادى.
