ينۆەستيسيالىق ىنتىماقتاستىقتى دامىتۋ جونىندەگى جول كارتاسىنا قول قويدى
قازاقستان پرەمەر-مينيسترى ءاليحان سمايىلوۆ پەن وزبەكستان پرەمەر-مينيسترى ابدۋللا اريپوۆ استانادا وتكەن تمد ۇكىمەت باسشىلارى كەڭەسىنىڭ وتىرىسى اياسىندا ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
بۇل تۋرالى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ حابارلايدى.
«ءبىز ءوزارا ءتيىمدى ىنتىماقتاستىقتىڭ بارلىق باعىتتارى بويىنشا قارىم-قاتىناستاردى ودان ءارى تەرەڭدەتۋگە دايىنبىز»، – دەدى ق ر پرەمەر-مينيسترى.
ءوز تاراپىنان ابدۋللا اريپوۆ وزبەكستاننىڭ بارلىق باسىم باعىت بويىنشا بەلسەندى جۇمىستى جالعاستىرۋعا دايىن ەكەنىن راستادى.
«قازاقستان – ەلىمىزدىڭ ءىرى ساۋدا سەرىكتەستەرىنىڭ ءبىرى. سوڭعى بەس جىلدا ەكىجاقتى تاۋار اينالىمى ەكى ەسەدەن استام ءوستى. ەندى ءبىزدىڭ الدىمىزدا ءوزارا ساۋدا كولەمىن $10 ملرد-قا جەتكىزۋ مىندەتى تۇر. ەلدەرىمىزدىڭ وڭىرلەرى اراسىنداعى ءوزارا ءتيىمدى ىنتىماقتاستىق تا نىعايا تۇسۋدە»، – دەدى ابدۋللا اريپوۆ.
كەزدەسۋ قورىتىندىسى بويىنشا ۇكىمەت باسشىلارى سالىقتىق رەتتەۋ، جۇك ءترانزيتى، ءبىلىم بەرۋ، ەنەرگەتيكا، اۋىل شارۋاشىلىعى جانە ت.ب. سالالارداعى شارالاردى ىسكە اسىرۋدى كوزدەيتىن قازاقستان رەسپۋبليكاسى مەن وزبەكستان رەسپۋبليكاسى اراسىنداعى ساۋدا-ەكونوميكالىق جانە ينۆەستيسيالىق ىنتىماقتاستىقتى دامىتۋ جونىندەگى جول كارتاسىنا قول قويدى.