ءماجىلىس قازاقستان مەن وزبەكستان ۇكىمەتتەرى اراسىنداعى «ورتالىق ازيا» حالىقارالىق ونەركاسىپتىك كووپەراسيا ورتالىعىنىڭ قىزمەتىن رەتتەۋ تۋرالى كەلىسىمدى راتيفيكاسيالادى.
قۇجاتقا 2023 جىلى 9 قاراشادا تاشكەنتتە قول قويىلعان. ورتالىق ونەركاسىپتىك كووپەراسيا، ەكونوميكالىق جانە ينۆەستيسيالىق ىنتىماقتاستىق كەشەنى رەتىندە جۇمىس ىستەيتىن بولادى، دەپ حابارلايدى aqshamnews.kz پارلامەنت ماجىلىسىنە سىلتەمە جاساپ.
ونىڭ مىندەتتەرى – مەملەكەتارالىق كووپەراتيۆتىك قاتىناستاردى دامىتۋعا قولايلى جاعداي جاساۋ، تاراپتاردىڭ شاعىن جانە ورتا ونەركاسىپتىك كاسىپورىندارىن حالىقارالىق قۇن تىزبەگىنە بىرىكتىرۋ، ورتالىق اۋماعىندا قۇرىلعان ونەركاسىپتىك كاسىپورىنداردىڭ باسەكەگە قابىلەتتىلىگىن ارتتىرۋ جانە باسقالار. حالىقارالىق ونەركاسىپتىك ىنتىماقتاستىق ورتالىعى ءارقايسىسى 500 شارشى مەتر اۋماقتى الاتىن، ءوز مەملەكەتىنىڭ قۇزىرىندا بولاتىن قازاقستاندىق جانە وزبەكستاندىق بولىكتەردەن تۇراتىن بولادى.
قازاقستاندىق بولىگىن باسقارۋ قازاقستان رەسپۋبليكاسىنىڭ ساۋدا جانە ينتەگراسيا مينيسترلىگىنە، ال وزبەك بولىگى وزبەكستان رەسپۋبليكاسىنىڭ ينۆەستيسيالار، يندۋستريا جانە ساۋدا مينيسترلىگىنە جۇكتەلدى. نىساننىڭ ورنالاسقان جەرى «اتامەكەن» (قازاقستان) جانە «گۇلىستان» (وزبەكستان) باقىلاۋ-وتكىزۋ بەكەتتەرى ماڭىنداعى ەلدەردىڭ شەكارالاس ايماقتارى بولىپ انىقتالدى. ولار ورتالىقتىڭ ءبىر بولىگىنەن ەكىنشى بولىگىنە وتەتىن ادامداردى، كولىك قۇرالدارىن، جۇكتەردى، تاۋارلار مەن جانۋارلاردى شەكارالىق، كەدەندىك جانە باسقا دا باقىلاۋ تۇرلەرىن جۇرگىزۋ ءۇشىن پايدالانىلادى.
ورتالىق اۋماعىندا شارۋاشىلىق سۋبەكتىلەرى وندىرىستىك كووپەراسيانى دامىتۋعا باعىتتالعان ءىس-شارالاردى جۇزەگە اسىرا الادى. كەلىسىمدى راتيفيكاسيالاۋ ەلدەردىڭ ءوندىرىس پەن كاسىپكەرلىكتى دامىتۋ سالاسىنداعى ىنتىماقتاستىعىن كەڭەيتۋگە، ينۆەستيسيا تارتۋعا جانە ساۋدا-ەكونوميكالىق قاتىناستاردى جاقسارتۋعا ىقپال ەتەدى.