قورقىت اتا اتىنداعى قىزىلوردا ۋنيۆەرسيتەتى تاشكەنت يرريگاسيا ينستيتۋتىمەن بىرلەسىپ سۋ ماماندارىن دايارلايدى.
وقۋ ورىندارى اراسىندا ءتيىستى كەلىسىم جاسالدى. ەندى پروفەسسورلىق قۇرام ءوزارا تاجىريبە الماسىپ، ستۋدەنتتەرگە قوس ديپلوم باعدارلاماسى بويىنشا ءبىلىم بەرەدى، دەپ حابارلايدى Almaty-akshamy.kz «حابار 24»-كە سىلتەمە جاساپ.
تاشكەنتتەگى يرريگاسيا ينستيتۋتىنىڭ تاريحى تەرەڭدە. ءبىلىم ورداسىندا سۋ ماماندارىنىڭ بىرنەشە بۋىنى قالىپتاسقان. بۇرىن ءبىزدىڭ ەلدە ينستيتۋت فيليالى جۇمىس ىستەدى. ءقازىر سول بايىرعى ءۇردىس قايتا جاندانۋى مۇمكىن. قىزىلوردالىق پروفەسسورلار وزبەكستاندىق ارىپتەستەرىمەن جاڭا جوبانى قولعا الماق.
«نەگىزگى ماقساتىمىز – قوس ديپلوم باعدارلاماسىن ەنگىزۋ. بۇل – عىلىمي زەرتتەۋ ينستيتۋتى. سوندىقتان ءبىزدىڭ ۋنيۆەرسيتەتكە قىزىلورداعا وسى جاقسى تاجىريبەلەردى اكەلىپ، سوسىن ءبىزدىڭ عالىمدارمەن بىرلەسىپ جۇمىس جاساۋ. بۇدان باسقا، ءبىز تاشكەنت ەكونوميكالىق ۋنيۆەرسيتەتىمەن كەزدەسپەكپىز. ول جاقتا دا تاجىريبە الماسىپ، كەلىسىمشارتقا وتىرامىز»، - دەيدى قورقىت اتا اتىنداعى قىزىلوردا ۋنيۆەرسيتەتىنىڭ پرورەكتورى ماينۇر بورىبايەۆا.
جالپى، باۋىرلاس قازاق پەن وزبەك ءۇشىن سۋ شارۋاشىلىعى – كۇرمەۋى قيىن كۇردەلى سالا. تىرشىلىك نارىنەن ەكى ەل دە تارشىلىق كورەدى. سوندىقتان گيدرولوگ ماماندارعا سۇرانىس ارتا ءتۇستى. ال تاشكەنت يرريگاسيا ينستيتۋتىنىڭ وسى سالادا تاجىريبەسى مول. ستۋدەنتتەر وقۋ ورنىنىڭ بازاسىندا سۋدى ۇنەمدەۋدى، ساقتاۋ مەن ءتيىمدى پايدالانۋ جولدارىن ۇيرەنىپ شىعادى.
«ارال باسسەينىندەگى وزەندەر ءۇشىن ەڭ وزەكتى ماسەلەلەردى زەرتتەپ جاتىرمىز. بۇل جەردە سۋ ارنالارىن شوگىندى، قاتتى مينەرالدى زاتتاردان تازارتۋ مىندەتى تۇر. ءامۋداريادا ونىڭ مولشەرى وتە كوپ. سىرداريادا ءسال كەم. وزەن ارنالارىن تازارتۋ جولىن ۇسىنىپ وتىرمىز. ارنايى قوندىرعى جاساپ شىعاردىق. ونى سۋ توراپتارىنا ورناتىپ، رەسۋرستاردى ءتيىمدى پايدالانۋعا بولادى»، - دەيدى تاشكەنت يرريگاسيا ينجەنەرلەرى ينستيتۋتىنىڭ كافەدرا مەڭگەرۋشىسى ايبەك اريفجانوۆ.
جوبانىڭ ماقساتى – قوس ديپلوم باعدارلاماسىن ەنگىزۋ عانا ەمەس، بىرلەسىپ عىلىمي زەرتتەۋلەر جۇرگىزۋ. وزبەكستاندىق عالىمدار دا وسىعان ىنتالى. مۇنداي ارىپتەستىك اۋىل شارۋاشىلىعى سالاسىنا قاجەتتى جاڭا ماماندار شوعىرىن قالىپتاستىرۋعا سەپ. قورقىت اتا ۋنيۆەرسيتەتى سىرتتاعى قانداستاردى دا نازاردان تىس قالدىرعان ەمەس. تاريحي وتانىندا ءبىلىم الام دەۋشىلەردى وقىتۋعا دايار.