بۇگىن سەناتتىڭ جالپى وتىرىسىندا «2000 جىلعى 7 شىلدەدەگى قازاقستان ۇكىمەتى مەن وزبەكستان ۇكىمەتى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاسيالاۋ تۋرالى» زاڭى ماقۇلداندى، دەپ حابارلايدى اlmaty-akshamy.kz.
اتالعان حاتتاماعا مەملەكەت باسشىسىنىڭ تاشكەنت قالاسىنا ساپارى اياسىندا 2022 جىلعى 22 جەلتوقساندا قول قويىلدى. وزبەكستان جاعى حاتتامانى بىلتىردىڭ ءساۋىر ايىندا راتيفيكاسيالادى. زاڭنىڭ ماقساتى - ەكى مەملەكەت اراسىنداعى دوستىق قارىم-قاتىناستاردى ودان ءارى دامىتۋ، ازاماتتاردىڭ ساپارلارىن رەتتەۋ، سونداي-اق ءبىر مەملەكەت ازاماتتارىنىڭ ەكىنشى مەملەكەتتىڭ اۋماعىندا بولۋى ءۇشىن قولايلى جاعدايلار جاساۋ ءۇشىن قۇقىقتىق نەگىزدى ودان ءارى جەتىلدىرۋ.
«حاتتامادا كەلىسىمنىڭ ءبىرقاتار باپتارىنىڭ جەكە تارماقتارى، كەلىسىمنىڭ قوسىمشالارى جاڭا رەداكسيادا جازىلىپ، كەيبىر باپتار الىنىپ تاستالدى. ولاردىڭ ىشىندە نەگىزگى وزگەرىستەر كەلىسىم تاراپتارى ازاماتتارىنىڭ ەكىنشى مەملەكەت اۋماعىنا كىرۋ جانە وندا بولۋ مەرزىمىن رەتتەيتىن 2ء-شى باپقا ەنگىزىلىپ وتىر. قولادانىستاعى 2-باپقا سايكەس، ەكى مەملەكەتتىڭ ازاماتتارى ەكىنشى تاراپ مەملەكەتىنىڭ اۋماعىنا 5 تاۋلىككە دەيىن تىركەۋسىز كەلەدى جانە وندا بولا الادى. حاتتاماعا سايكەس، ەگەر ازاماتتاردىڭ بولۋ كەزەڭى تاراپ مەملەكەتىنىڭ مەملەكەتتىك شەكاراسىن كەسىپ وتكەن كەزدەن باستاپ كۇنتىزبەلىك 30 كۇننەن اسپاسا، قۇزىرەتتى ورگانداردا تىركەۋسىز ولاردىڭ اۋماقتارىندا بولۋىنىڭ وڭتايلانعان ءتارتىبى ەنگىزىلىپ وتىر. وسىلايشا، حاتتامادا ازاماتتاردىڭ ەكىنشى تاراپ مەملەكەتىنىڭ اۋماعىندا بولۋىنىڭ مەرزىمى ۋاقىتشا تىركەۋسىز 5 كۇننەن 30 كۇنگە دەيىن ۇلعايتىلىپ وتىر»، - دەدى سەناتور قايرات تاستەكەيەۆ.
حاتتامادا قاراستىرىلىپ وتىرعان كەلەسى وزگەرىس – ول ەكىنشى تاراپ مەملەكەتىنىڭ اۋماعىنا كەلۋ كەزىندە تاراپتار مەملەكەتتەرىنىڭ (قازاقستان مەن وزبەكستان) ازاماتتارىنا شەكارالىق قىزمەت بەرەتىن جانە كەتۋ كەزىندە قايتارىلۋعا جاتاتىن كوشى-قون باقىلاۋ كارتوچكالارىنا بايلانىستى نورمالاردىڭ الىنىپ تاستالۋى.
«وسى وزگەرىستەردەن كەيىن، ازاماتتار كەلەسى تاراپ اۋماعىنا حاتتامانىڭ قوسىمشالارىندا تىزبەسى بەكىتىلگەن جەكە باسىن كۋالاندىراتىن جانە ازاماتتىعىن راستايتىن قۇجاتتار نەگىزىندە كىرەدى، ودان شىعادى، ترانزيتپەن وتەدى، ءجۇرىپ-تۇرادى. «قازاقستان رەسپۋبليكاسىنىڭ حالىقارالىق شارتتارى تۋرالى» زاڭىنا سايكەس حاتتاما راتيفيكاسيالاۋعا جاتادى»، - دەدى دەپۋتات.
ءوز كەزەگىندە سەنات ءتوراعاسى ماۋلەن اشىمبايەۆ قازاقستان مەن وزبەكستان اراسىندا بەرىك باۋىرلاستىق قارىم-قاتىناس قالىپتاسقانىن اتاپ ءوتتى.
«مەملەكەتتەر قول قويعان ماڭگىلىك دوستىق تۋرالى جانە وداقتاستىق تۋرالى شارتتار سونىڭ ايقىن دالەلى. بۇگىن قارالعان حاتتاما ەكى ەل ازاماتتارىنا ءوزارا ساپارلارىن جۇزەگە اسىرۋدا قوسىمشا وڭتايلى قۇقىقتىق جاعداي ورناتادى. ماقۇلدانعان زاڭ تاتۋ كورشىلىك قارىم-قاتىناستى ودان ءارى نىعايتۋعا ءوز ۇلەسىن قوسادى دەپ سەنەمىز»، - دەدى سەنات ءتوراعاسى.