قازاقستان مەن يتاليانىڭ اسكەري الپينيستەرى نۇرسۇلتان شىڭىن باعىندىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
يتاليا قارۋلى كۇشتەرىنىڭ الپينيستەرىمەن تاجىريبە الماسۋ اياسىندا تۇيىق-سۋ شاتقالىنان – مىڭجىلقى ءۇستىرتى – نۇرسۇلتان شىڭى باعىتى بويىنشا ءتورت مىڭ مەترگە (4330،9 م) شىقتى.
جيىن تاۋ دايىندىعى وقۋ-جاتتىعۋ ورتالىعىندا قازاقستاندىق ارنايى وپەراسيالىق كۇشتەر اسكەري قىزمەتشىلەرى مەن تاۋداعى پراكتيكالىق وپەراسيالاردا تاجىريبەسى بار يتالياندىق نۇسقاۋشىلاردىڭ قاتىسۋىمەن ءوتتى.
اتالعان شارا جاۋىنگەرلىك تاپسىرمالاردى ورىنداۋ كەزىندە اسكەري قىزمەتشىلەردىڭ تاۋ دايىندىعى مەن توزىمدىلىك دەڭگەيىن ارتتىرۋعا باعىتتالعان. ساباقتا بولىمشەلەردىڭ تاۋداعى قوزعالىسى كەزىندەگى قاۋىپسىزدىك شارالارىنا ەرەكشە كوڭىل ءبولىندى. جيىن قاتىسۋشىلارىنا ءتيىستى سەرتيفيكاتتار تابىس ەتىلدى.
بۇل قازاقستان مەن يتاليا اراسىنداعى اسكەري ىنتىماقتاستىقتىڭ العاشقى تاجىريبەسى ەمەس. 2013 جىلى شىلدە ايىندا ەلىمىز قارۋلى كۇشتەرى قۇرلىق اسكەرلەرىنىڭ بولىمشەلەرى يتاليانىڭ ءالپى تاۋلارىندا وتكەن تاۋ بولىمشەلەرىنىڭ «فالزارەگو» وقۋ-جاتتىعۋىنا قاتىسقانىن ايتا كەتۋ كەرەك.