288 ملرد تەڭگەگە جۋىق قارجىلىق بۇزۋشىلىقتار انىقتالدى
9 ايدىڭ ىشىندە 32 مىڭعا جۋىق مەملەكەتتىك ساتىپ الۋ بويىنشا زاڭبۇزۋشىلىق انىقتالعان. ق ر قارجى مينيسترلىگى ىشكى مەملەكەتتىك اۋديت كوميتەتىنىڭ ءتوراعاسى ەرجان مىڭجاساروۆ جىل باسىنان بەرى 288 ميلليارد تەڭگەنىڭ قارجىلىق بۇزۋشىلىقتارى انىقتالعانىن ايتتى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
"جىل باسىنان بەرى ءبىز 1851 تەكسەرۋ جۇرگىزدىك. تەكسەرۋ قورىتىندىسى بويىنشا 288 ملرد تەڭگەگە جۋىق قارجىلىق بۇزۋشىلىقتار انىقتالدى. ونىڭ 10 ميلليارد تەڭگەگە جۋىعى بيۋدجەتكە وتەلدى. 29 ملرد تەڭگەگە جۋىق سوماعا تاۋارلار جەتكىزىلدى، قىزمەتتەر كورسەتىلدى، جۇمىستار اتقارىلدى. 233 ملرد تەڭگەدەن استام سوماعا كەمشىلىكتەر بۋحگالتەرلىك ەسەپتەرگە سايكەستەندىرىلدى"، دەدى ەرجان مىڭجاساروۆ ورتالىق كوممۋنيكاسيالار قىزمەتىندە وتكەن بريفينگتە.
ونىڭ ايتۋىنشا، تەكسەرىلەتىن سۋبەكتىلەرگە 1638 نۇسقاما بەرىلىپ، ونىڭ 70 پايىزدان استامى ورىندالعان. اكىمشىلىك قۇقىق بۇزۋشىلىق تۋرالى كودەكسكە سايكەس 6901 ماتەريال بويىنشا ءىس قوزعالىپ، جالپى سوماسى 605 ميلليون تەڭگەدەن استام ايىپپۇل سالىندى. بۇگىنگى تاڭدا بيۋدجەتكە 587 ميلليون تەڭگە نەمەسە 97 پايىزى تولەندى. 1595 تۇلعا تارتىپتىك جاۋاپكەرشىلىككە تارتىلدى. قۇقىق قورعاۋ ورگاندارىنا 150-گە جۋىق ماتەريال جىبەرىلىپ 80 ماتەريال بويىنشا قىلمىستىق ءىس قوزعالدى.