تەگەران قالاسىندا قازاقستان مەن يران اراسىنداعى ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى ۇكىمەتارالىق كوميسسيانىڭ 19-شى وتىرىسى ءوتتى.
قازاقستان پرەمەر-مينيسترىنىڭ ورىنباسارى سەرىك جۇمانعارين مەن يران اۋىل شارۋاشىلىعى ءمينيسترى موحامماد الي نيكباحتتىڭ تەڭ توراعالىعىمەن وتكەن شاراعا ەكى ەل مينيسترلىكتەرى مەن مەملەكەتتىك كاسىپورىندارىنىڭ وكىلدەرى قاتىستى، دەپ حابارلايدى Almaty-akshamy.kz
ۇكىمەتارالىق كوميسسيا وتىرىسىندا تاراپتار ساۋدا، اۋىل شارۋاشىلىعى، لوگيستيكا، ەنەرگەتيكا، دەنساۋلىق ساقتاۋ، ءبىلىم بەرۋ، تۋريزم جانە باسقا دا سالالارداعى مەملەكەتارالىق قاتىناستاردىڭ تابىستى دامىپ كەلە جاتقانىن اتاپ ءوتتى.
سەرىك جۇمانعارين ەكى مەملەكەتتىڭ باسشىلارى قازاقستان مەن يران اراسىنداعى تاۋار اينالىمىن ءۇش ميللياردتىق مەجەگە جەتكىزۋ مىندەتىن قويعانىن ەسكە سالدى.
«وسى تاپسىرمانى ورىنداۋدىڭ العاشقى قادامى ءوزارا تاۋار اينالىمىن $3 ملرد-قا جەتكىزۋ جونىندەگى ءىس-شارالار جوسپارىنا قول قويۋ بولادى. قۇجات ەكسپورتتاۋشى كاسىپورىنداردى بىرنەشە باعىتتا قولداۋدى كوزدەيدى: ءوزارا ساۋدا كولەمىن ۇلعايتۋ، ساۋدا-ساتتىقتاعى شەكتەۋلەردى الىپ تاستاۋ، ەكىجاقتى كليرينگ مەحانيزمىن ەنگىزۋ جانە ت.ب.»، —دەدى ۆيسە-پرەمەر. ول سونداي-اق قازاقستاندىق كومپانيالار يران نارىعىنا شيكىزاتتىق ەمەس تاۋارلاردىڭ ۇزدىكسىز ەكسپورتىن جولعا قويۋعا مۇددەلى ەكەنىن ايتتى.
وندىرۋشىلەر يراندىق تۇتىنۋشىلارعا جالپى سوماسى شامامەن $250 ملن بولاتىن 75 تاۋار پوزيسياسى بويىنشا ءونىم جەتكىزۋگە دايىن.
سونىمەن قاتار وتىرىس بارىسىندا سەرىك جۇمانعارين ەاەو-عا مۇشە مەملەكەتتەر مەن يران اراسىندا ەركىن ساۋدا تۋرالى تولىققاندى كەلىسىم جاساسۋدا ەلدەردىڭ قول جەتكىزگەن جەتىستىكتەرىنە وڭ باعا بەردى.
يراننىڭ اۋىل شارۋاشىلىعى ءمينيسترى موحامماد الي نيكباحتتىڭ ايتۋىنشا، يراندىق كاسىپورىندار قازاقستانعا بالىق جانە ءسۇت ونىمدەرى، بال، جەمىستەر مەن كوكونىستەر، كەپتىرىلگەن جەمىستەر جانە باسقا دا ازىق-تۇلىك ونىمدەرىن جەتكىزۋدى ۇيىمداستىرا الادى. سونداي-اق يراندىق تاراپ قازاقستاندىق ينۆەستيسياعا قىزىعۋشىلىق تانىتتى. تەگەران قازاقستاننان كەلگەن ينۆەستورلارعا يراننىڭ ەركىن ەكونوميكالىق ايماقتارىندا بيزنەس جۇرگىزۋ ءۇشىن ەرەكشە جاعدايلار جاساۋعا دايىن.
وعان قوسا ۇكىمەتارالىق كوميسسيا اياسىندا كولىك-لوگيستيكالىق ىنتىماقتاستىقتى ودان ءارى كەڭەيتۋ ماسەلەسى تالقىلاندى. اتاپ ايتقاندا، سولتۇستىك-وڭتۇستىك حالىقارالىق كولىك دالىزدەرىن دامىتۋ قارالدى. كاسپيي تورابى بۇل باعىتتاعى نەگىزگى بۋىنعا اينالۋى مۇمكىن.
قازاقستان پرەمەر-مينيسترىنىڭ ورىنباسارى تەگەرانعا جۇمىس ساپارى بارىسىندا اۋىل شارۋاشىلىعى، تۇرعىن ۇي-كوممۋنالدىق شارۋاشىلىق، ينۆەستيسيا، تاۋ-كەن جانە مەتاللۋرگيا ونەركاسىبى، ونەركاسىپ جانە كولىك سالالارىنداعى جەتەكشى يراندىق كاسىپكەرلەرمەن كەزدەستى.
پلەنارلىق وتىرىس سوڭىندا قازاقستان پرەمەر-مينيسترىنىڭ ورىنباسارى سەرىك جۇمانعارين مەن يراننىڭ اۋىل شارۋاشىلىعى ءمينيسترى موحامماد الي نيكباحت قازاقستان رەسپۋبليكاسى مەن يران يسلام رەسپۋبليكاسى اراسىنداعى 19-شى بىرلەسكەن ۇكىمەتارالىق كوميسسيانىڭ حاتتاماسىنا جانە تاۋار اينالىمىن $3 ملرد-قا دەيىن جەتكىزۋ جونىندەگى ءىس-شارالار جوسپارىنا قول قويدى.
سونىمەن قاتارۇكىمەتارالىق كوميسسيانىڭ قورىتىندىسى بويىنشا اۋىل شارۋاشىلىعى جانە مەترولوگيا سالالارىنداعى قۇجاتتارعا قول قويىلدى:
-
قازاقستان مەن يراننىڭ اۋىل شارۋاشىلىعى مينيسترلىكتەرى اراسىنداعى ۆەتەريناريا سالاسىنداعى ىنتىماقتاستىق تۋرالى مەموراندۋم.
-
قازاقستان ستاندارتتاۋ جانە مەترولوگيا ينستيتۋتى مەن يراننىڭ ۇلتتىق ستاندارتتاۋ ۇيىمى ۇلتتىق مەترولوگيا ورتالىعى اراسىنداعى مەترولوگيا سالاسىنداعى ءوزارا تۇسىنىستىك تۋرالى مەموراندۋم.
تەگەرانعا جۇمىس ساپارى بارىسىندا قازاقستاننىڭ ۆيسە-پرەمەرى يراننىڭ اۋىل شارۋاشىلىعى، تكش، ينۆەستيسيالار، تمك، ونەركاسىپ جانە كولىك سالاسىنداعى كوشباسشى بيزنەسمەندەرىمەن كەزدەستى.