2023 جىلدىڭ 9 ايىنىڭ قورىتىندىسى بويىنشا قازاقستان مەن گەرمانيا اراسىنداعى اوك ونىمدەرىنىڭ تاۋار اينالىمى 94 ملن دوللاردى قۇراعان.
قازاقستاننان گەرمانياعا ەكسپورت كولەمى 23،5 ملن دوللاردى، گەرمانيادان قازاقستانعا يمپورت كولەمى 70،3 ملن دوللارعا جەتتى، دەپ حابارلايدى اlmaty-akshamy.kz سالالىق مينيسترلىككە سىلتەمە جاساپ.
ەكى ەلدىڭ قارىم-قاتىناستارىن نىعايتۋ ءۇشىن 2023 جىلدىڭ 15-17 قاراشاسىندا ق ر پرەمەر-مينيسترىنىڭ ءبىرىنشى ورىنباسارى رومان سكليار باستاعان قازاقستاندىق دەلەگاسيا بەرلينگە ىسساپارمەن باردى. وندا ق ر اۋىل شارۋاشىلىعى ۆيسە-مينيسترى ءابىلحايىر تامابەك گفر اۋىل شارۋاشىلىعى جانە ازىق-تۇلىك فەدەرالدىق ءمينيسترى جانىنداعى ستاتس-حاتشى دوكتور و.نيكپەن كەزدەستى.
كەزدەسۋدە ۆيسە-مينيستر قازاقستان مەن گەرمانيا ىنتىماقتاستىعىنىڭ باسىم باعىتتارى – تۇقىم شارۋاشىلىعى، وسىمدىكتەردى قورعاۋ، سيفرلىق ەگىنشىلىك جانە اۋىل شارۋاشىلىعى يننوۆاسيالارى ەكەنىن اتاپ ءوتتى. مىسالى، وتكەن جىلى قازاقستان PETKUS Technologie GmbH كومپانياسىمەن ىنتىماقتاستىق تۋرالى مەموراندۋمعا قول قويدى، ول وتاندىق فەرمەرلەرگە سەلەكسيالىق جانە تۇقىم ءوسىرۋ تەحنيكاسىن جەڭىلدىكپەن الۋعا مۇمكىندىك بەردى.
سونداي-اق، تۇقىم شارۋاشىلىعىنداعى زاماناۋي تەحنولوگيالار بويىنشا قازاقستاندىق ماماندارعا كونسۋلتاسيالىق قولداۋ كورسەتۋ جانە بىرلەسكەن وقىتۋ سەمينارلارىن وتكىزۋ تۋرالى ۋاعدالاستىققا قول جەتكىزىلدى. قازاقستاندا اۋىل شارۋاشىلىعىن دامىتۋعا سولتۇستىك قازاقستان وبلىسىندا كلااس كومپانياسىنىڭ زاۋىتىن ىسكە قوسۋ ۇلكەن سەرپىن بەردى. جاقىن ارادا زاۋىت جانىنان كوللەدج ستۋدەنتتەرى مەن جاس مامانداردى ءدۋالدى وقىتۋ قاعيداتى بويىنشا كلااس تەحنيكالارىن جوندەۋگە جانە تەحنيكالىق قىزمەت كورسەتۋگە وقىتۋ ءۇشىن قۇزىرەتتىلىك ورتالىعىن اشۋ جوسپارلانعان. ءابىلحايىر تامابەك ءقازىردىڭ وزىندە كوپتەگەن گەرمان كومپانيالارى قازاقستانداعى ءوز وقۋ ورتالىقتارى ارقىلى كاسىبي-تەحنيكالىق كادرلاردى وقىتۋعا ەلەۋلى ۇلەس قوسىپ كەلە جاتقانىن اتاپ ءوتتى.
««اگرارلىق-ساياسي ديالوگ» (Aسد)، «نەمىس اگرارلىق ورتالىعى» جانە «قازاقستاننىڭ ءسۇت ءوندىرۋ سالاسىنداعى قۇزىرەتتىلىكتى ارتتىرۋ» سياقتى ەكىجاقتى كووپەراسيالىق جوبالار اياسىنداعى ىنتىماقتاستىق جوعارى دەڭگەيدە ىسكە اسىرىلىپ كەلە جاتقانىن اتاپ وتكىم كەلەدى. جۇمىس ىستەپ تۇرعان ورتالىقتار مەن جوبالاردىڭ قىزمەتىن ەكى تاراپ تا وڭ باعالايدى جانە اوك سالاسىنداعى قازاقستان-گەرمان ىنتىماقتاستىعىن دامىتۋعا ەلەۋلى ۇلەس قوسادى»، - دەدى ۆيسە-مينيستر.
ونىڭ ايتۋىنشا، قازاقستاندىق دەلەگاسيا 2024 جىلدىڭ 19-28 قاڭتارىندا بەرليندە وتەتىن 88ء-شى اۋىل شارۋاشىلىعى حالىقارالىق «جاسىل اپتا 2023» كورمەسىنە قاتىسادى.
قازاقستان مەن گەرمانيا وكىلدەرىنىڭ كەزدەسۋ قورىتىندىسى بويىنشا گفر فەدەرالدىق ازىق-تۇلىك جانە اۋىل شارۋاشىلىعى مينيسترلىگى مەن ق ر اۋىل شارۋاشىلىعى مينيسترلىگى اراسىندا «گەرمانيا-قازاقستان اگرارلىق-ساياسي ديالوگى» ەكىجاقتى كووپەراسيالىق جوباسى اياسىندا ىنتىماقتاستىقتى ودان ءارى دامىتۋ جانە تەرەڭدەتۋ تۋرالى بىرلەسكەن مالىمدەمەگە قول قويدى.
سونىمەن قاتار، ءابىلحايىر تامابەك گەرمانيا اگروبيزنەس اليانسىنىڭ ديرەكتورى دوكتور پەر برودەرزەنمەن كەلىسسوز جۇرگىزدى. تاراپتار تۇقىم مەن تىڭايتقىش وندىرىسىنە قاتىستى ماسەلەلەردى تالقىلادى. كەزدەسۋ سوڭىندا اليانسپەن مەموراندۋمعا قول قويىلدى.