قازاقستان سىرتقى ىستەر ءمينيسترىنىڭ ورىنباسارى الىبەك باقايەۆ ەو ەۋروپالىق سىرتقى ءىس-قيمىل قىزمەتى باسقارۋشى ديرەكتورىنىڭ رەسەي، شىعىس ارىپتەستىگى، ورتالىق ازيا جانە ەقىۇ جونىندەگى ورىنباسارى ليۋك ديەۆينمەن، سونداي-اق ەو كوشى-قون جانە ىشكى ىستەر دەپارتامەنتى باس ديرەكتورىنىڭ ورىنباسارى يوحاننەس لۋحنەرمەن كەلىسسوزدەر جۇرگىزدى.
كەلىسسوزدەر بارىسىندا تاراپتار قازاقستان مەن ەۋروپالىق وداقتىڭ ساياسي جانە ساۋدا-ەكونوميكالىق ىنتىماقتاستىعىن، زاڭ ۇستەمدىگى مەن ادام قۇقىقتارى، كولىك، ەنەرگەتيكا، كليماتتىڭ وزگەرۋىنە قارسى كۇرەس، قورشاعان ورتانى قورعاۋ، ءبىلىم جانە عىلىم سالالارىنداعى ءوزارا ءىس-قيمىلدى، سونداي-اق ق ر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى ىسكە اسىرۋدى تالقىلادى، دەپ حابارلايدى almaty-akshamy.kz
قازاقستان ازاماتتارى ءۇشىن ەو ۆيزالىق رەجيمىن جەڭىلدەتۋ ماسەلەسىنە ەرەكشە نازار اۋدارىلدى. ق ر سىرتقى ىستەر ءمينيسترىنىڭ ورىنباسارى ەلىمىز ەۋروپا ەلدەرى ءۇشىن ۆيزاسىز رەجيمدى ەنگىزۋ بويىنشا ءبىرجاقتى قادامدار جاساعانىن ايتىپ، قازاقستاندىق قوعام شەنگەن ۆيزالارىن الۋدى جەڭىلدەتەتىن جاۋاپ شارالارىن كۇتەتىنىن اتاپ ءوتتى. ول بۇل ماسەلەنى تەز ارادا شەشۋگە ءۇمىت ءبىلدىردى.
سونىمەن قاتار ديپلوماتتار وڭىرلىك قاۋىپسىزدىك جانە اۋعانستانداعى قازىرگى جاعداي تۋرالى پىكىر الماستى. قازاق ديپلوماتى ءۇ.ج. 30 ماۋسىم - 1 شىلدە ارالىعىندا دوحادا بۇۇ ۇيىمداستىرعان اۋعانستان بويىنشا ارنايى وكىلدەردىڭ ءۇشىنشى كەزدەسۋىنىڭ، سونداي-اق ەو-نىڭ اۋعانستان بويىنشا ارنايى وكىلى توماس نيكلاسسونمەن كەلىسسوزدەردىڭ ناتيجەلەرىمەن ءبولىستى.
جالپى، تاراپتار قازاقستان مەن ەۋرووداقتىڭ بارلىق باعىتتار بويىنشا ءوزارا ءىس-قيمىل دەڭگەيىنە قاناعاتتانۋشىلىقتارىن ءبىلدىرىپ، ىنتىماقتاستىقتىڭ الداعى جوسپارلارىن ايقىندادى.