پاۆلودار وبلىسىندا «مايقايىڭالتىن» اق اۋماعىندا بيىلعى جىلدىڭ قاڭتار ايىنىڭ باسىندا اۆتوبۋسپەن بىرگە ەسكى شاحتانىڭ شۇڭقىرىنا قۇلاپ كەتكەن ءتورت قۇتقارۋشىنىڭ ءۇشىنشىسى – 36 جاستاعى ايدوس شايمەردەننىڭ ءمايىتى تابىلدى.
بۇل اقپاراتتى ايدوس شايمەردەنوۆتىڭ ايەلى نۇرسۇلۋ شايمەردەن راستادى، دەپ حابارلايدى almaty-akshamy.kz.
كاسىبي اسكەريلەندىرىلگەن اۆاريالىق-قۇتقارۋ جۇمىستارى قىزمەتى رەسپۋبليكالىق ورتالىق شتابىنىڭ پاۆلودار فيليالى قۇتقارۋشىنىڭ ءمايىتى توتەنشە جاعدايدان التى اي وتكەن سوڭ، 19 شىلدە كۇنى تاڭەرتەڭ تابىلعانىن حابارلادى.
«قۇتقارۋشى ايدوس شايمەردەننىڭ ءمايىتى تابىلدى. مايىتپەن بىرگە ونىڭ توسبەلگىسىن دە تاپتىق. ءقازىر ءمايىت سوت-مەديسينالىق ساراپتاماعا جىبەرىلدى. ءبىز ونى بۇگىن، 19 شىلدەدە ساعات 06:15-تە الدىن الا بولجانعان جەردەن تاۋىپ، ىزدەستىرۋ جۇمىستارىن جۇرگىزدىك، ءمايىت ساعات 13:45-تە عانا شىعارىلدى»، دەدى «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» ج ش س پاۆلودار فيليالى باسشىسىنىڭ ورىنباسارى ەرلان جاركىمبەكوۆ.
بۇرىن حابارلانعانداي، ىزدەۋ شارالارى 28 ماۋسىمدا قايتا جانداندى.
ەستەرىڭىزگە سالا كەتەيىك، بيىلعى جىلدىڭ 4 قاڭتارىندا پاۆلودار وبلىسىندا «مايقايىڭالتىن» اق اۋماعىندا ءتورت تاۋ-كەن قۇتقارۋشىسى مىنگەن اۆتوبۋس شاحتانى تازالاۋ كەڭىستىگىنە قۇلاپ كەتكەن بولاتىن. سول كۇنى ەكى قۇتقارۋشى ءولى تابىلىپ، جەر بەتىنە شىعارىلدى. جەدەل كولىكتىڭ 55 جاستاعى جۇرگىزۋشىسى ايىپ تىلەۋبەرگەنوۆ پەن ۆزۆود كومانديرىنىڭ 36 جاستاعى ورىنباسارى ايدوس شايمەردەننىڭ دەنەسى وسى ۋاقىتقا دەيىن جەر استىندا بولعان.