قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو ەۋروپالىق كوميسسيانىڭ حالىقارالىق ارىپتەستىك جونىندەگى باس ديرەكسياسىنىڭ تاياۋ شىعىس، ازيا جانە تىنىق مۇحيتى ىستەرى جونىندەگى ديرەكتورى پەتەريس ۋستۋبپەن كەزدەسۋ وتكىزدى.
سۇحبات بارىسىندا تاراپتار سيفرلىق ترانسفورماسيا جانە وڭىرلىك ءوزارا بايلانىس سالاسىندا ءىس-قيمىلدى نىعايتۋعا باسا نازار اۋدارىپ، قازاق-ەۋروپالىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
ءمينيستردىڭ ورىنباسارى قازاقستان مەن ەۋروپالىق وداق اراسىنداعى ساياسي بايلانىستاردىڭ جوعارى سەرپىنىن قۇپتاپ، ءوزارا مۇددەلى ماسەلەلەر بويىنشا ىنتىماقتاستىقتى نىعايتۋدىڭ ماڭىزىن اتاپ ءوتتى.
بۇل تۇرعىدا ر.ۆاسيلەنكو ورتالىق ازياداعى سيفرلىق ەكونوميكانى دامىتۋعا، سونىڭ ىشىندە اۋىلدىق ايماقتاردا سپۋتنيكتىك بايلانىس ارقىلى ءقاۋىپسىز ينتەرنەتكە قول جەتكىزۋدى قامتاماسىز ەتۋگە باعىتتالعان «Team Europe Initiative on Digital Connectivity» باستاماسىنا قولداۋ ءبىلدىردى.
سۇحباتتاستار كولىك-لوگيستيكا سالاسىنداعى ىقپالداستىقتى ودان ءارى دامىتۋدىڭ ماڭىزىن اتاپ ءوتىپ، ترانسكاسپيي حالىقارالىق كولىك باعىتىن (تحكب) دامىتۋ بويىنشا ۇيلەستىرۋ پلاتفورماسىنىڭ بەلسەندى جۇمىسىن قۇپتادى.
كەزدەسۋ قورىتىندىسى بويىنشا اتالعان سالالارداعى ىنتىماقتاستىقتى جالعاستىرۋ تۋرالى كەلىسىمگە قول جەتكىزىلدى.
انىقتاما: قازاقستان مەن ەو اراسىندا كەڭەيتىلگەن ارىپتەستىك جانە ىنتىماقتاستىق تۋرالى كەلىسىمگە قول قويىلىپ، راتيفيكاسيالانعان. اتالعان قۇجات ساۋدا، ينۆەستيسيا، ينفراقۇرىلىمدى دامىتۋ، سونداي-اق يننوۆاسيالار، مادەنيەت، سپورت جانە تۋريزم ماسەلەلەرىن سەكىلدى ءوزارا ءىس-قيمىلدىڭ 29 سالاسىن قامتيدى.
بىلتىر ەۋرووداقپەن تاۋار اينالىمى 3،5%-عا ءوسىپ، 41،4 ملرد اقش دوللارىن قۇرادى. 2005 جىلدان بەرى قازاقستان ەكونوميكاسىنا ەۋروپالىق ينۆەستيسيالاردىڭ كولەمى 180 ملرد دوللاردان استى. قازاقستاندا ەۋروپالىق كاپيتالدىڭ قاتىسۋىمەن 3 مىڭنان استام كومپانيا جۇمىس ىستەيدى، سونىڭ ىشىندە «Shell»، «Sneider»، «Eni»، «Total»، «Air Liquide»، «Alstom»، «Siemens» جانە ت.ب. ترانسۇلتتىق كورپوراسيالار بار.
جالپى سوماسى 300 ملرد ەۋرودان استام قارجى بولىنگەن «Global Gateway» باستاماسى اياسىندا ەۋروپالىق وداق قازاقستاندا ينفراقۇرىلىمدىق، اتاپ ايتقاندا، تحكب-نى دامىتۋعا باعىتتالعان جوبالاردى جۇزەگە اسىرۋعا نيەتتى.