قازاقستان مەن ەۋروپالىق وداق سيرەك كەزدەسەتىن جەر ەلەمەنتتەرىن ءوندىرىپ، وسى سالادا ىنتىماقتى كۇشەيتپەك.
جاقىندا مىسىردا ۇكىمەت باسشىسى ءاليحان سمايىلوۆ پەن ەۋروپالىق كوميسسيا ءتوراعاسى ۋرسۋلا فون دەر ليايەن تۇراقتى شيكىزات، باتارەيالار جانە «جاسىل» سۋتەگى قۇنى تىزبەگى سالاسىنداعى ستراتەگيالىق ارىپتەستىك تۋرالى مەموراندۋمعا قول قويعان بولاتىن. وسى كەلىسىمدى جۇزەگە اسىرۋ ءۇشىن قوس تاراپ جول كارتاسىن ازىرلەمەك، دەپ حابارلايدى Almaty-akshamy.kz.
ەلىمىزدىڭ يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ بريۋسسەلدە ەۋروپالىق وداق وكىلدەرىمەن كەزدەستى. تاراپتار گەولوگيالىق بارلاۋعا بىرلەسىپ قاراجات تارتۋ، جاڭا ءوندىرىس ورىندارىن قۇرۋ، كومىرتەگى قالدىقتارىن ازايتۋ جانە كەن ورىندارىن سيفلاندىرۋ ماسەلەلەرىن تالقىلادى.
«جاسىل تەحنولوگياعا كوشىپ، سيفرلاندىرۋدى دامىتۋ ءۇشىن ءبىز ءۇش نارسەگە باسىمدىق بەرمەكپىز. ول - شيكىزات، جاسىل سۋتەگى جانە باتارەيالار. وسىعان قاجەتتى شيكىزات ماتەريالدارىن جەر استىنان ىزدەۋ، قايتا وڭدەۋ، ياعني بارلىق كەزەڭ بويىنشا ىسكەرلىكتى ارتتىرۋعا نيەتتىمىز»، - دەيدى ەۋروپالىق كوميسسيانىڭ شيكىزات ءبولىمىنىڭ جەتەكشىسى پيتەر حەندلي.
«بىرىنشىدەن، ەۋروپادان ينۆەستيسيا تارتۋ، ەكىنشىدەن، تەحنولوگيا تارتۋ. ال ەڭ باستى العا قويىپ وتىرعان ماقساتىمىز - تەك قانا ەۋروپاعا شيكىزات جىبەرەمىز ەمەس، سول تولىققاندى ءوندىرىستى ەل اۋماعىندا قويىپ، وسى ەۋروپا ەلدەرىنە بولسىن، كاسىپورىندارىنا بولسىن دايىن تاۋاردى جىبەرۋ»، - دەيدى ق ر يندۋستريا جانە ينفراقۇرىلىمدىق دامۋ ۆيسە-مينيسترى مارات قارابايەۆ.