جەردى قاشىقتىقتان زوندتاۋدىڭ عارىشتىق جۇيەسى كورسەتىلدى
استانادا اسكەري توپوگرافيا، گەودەزيا، كارتوگرافيا جانە ناۆيگاسيا ماسەلەلەرى بويىنشا قازاقستان مەن بەلارۋس قورعانىس ۆەدومستۆولارىنىڭ قىزمەتتەرى اراسىندا جۇمىس كەزدەسۋى ءوتتى، دەپ حابارلايدى Almaty-akshamy.kz.
ەكى كۇن بويى ارىپتەستەر جەرگىلىكتى جەر تۋرالى جانە كارتوگرافيالىق، اسكەرلەردى جاۋىنگەرلىك قامتاماسىز ەتۋ جۇيەسىندە ءبىلىمدى ءىس جۇزىندە قولدانۋ تۋرالى اقپارات بەرۋ سالاسىندا تاجىريبە الماستى. تاراپتار ودان باسقا باسقارۋ ورگاندارىنىڭ شەشىمىن قابىلداۋدى قولداۋ جۇيەسىنە ارنايى تەحنيكا مەن گەواقپاراتتىق تەحنولوگيالاردىڭ پەرسپەكتيۆالىق ۇلگىلەرىن جوبالاۋ، قۇرۋ جانە ەنگىزۋ ماسەلەلەرىن تالقىلادى.
بەلارۋس ارمياسىنىڭ اتىنان قارۋلى كۇشتەردىڭ ناۆيگاسيالىق-توپوگرافيالىق قىزمەتىنىڭ باستىعى – رب قك باس شتابىنىڭ ناۆيگاسيالىق-توپوگرافيالىق باسقارماسىنىڭ باستىعى پولكوۆنيك الەكسەي باكانوۆ قازاقستاندىق تاراپتىڭ شاقىرۋىمەن كەلگەنىن اتاپ ءوتتى.
– جۇمىس كەزدەسۋى بارىسىندا ءبىز اسكەرلەردى جەرگىلىكتى جەر تۋرالى زاماناۋي اقپاراتپەن قامتاماسىز ەتۋ ءتارتىبىنىڭ ماسەلەلەرىن قاراستىردىق، جەرگىلىكتى جەر تۋرالى اقپاراتتى قامتاماسىز ەتۋ جانە جاساۋ بويىنشا باعدارلامالىق اپپاراتتىق قۇرالداردىڭ قالاي قولدانىلاتىنىن تالقىلادىق. شارا العاش رەت قازاقستان اۋماعىندا ءوتىپ وتىر. مۇنداي ءوزارا ءىس-قيمىل وسىنداي قىزمەتتى دامىتۋ ءۇشىن ناتيجەسىن بەرەدى دەپ ويلايمىن، – دەيدى ق ر قك باس شتابىنىڭ گەواقپاراتتىق قامتاماسىز ەتۋ دەپارتامەنتىنىڭ باستىعى پولكوۆنيك سەرىك جولدىبايەۆ.
بەلارۋس دەلەگاسياسى تۇڭعىش پرەزيدەنت اتىنداعى ۇلتتىق قورعانىس ۋنيۆەرسيتەتىندە بولدى. «قازاقستان عارىش ساپارى «ۇلتتىق كومپانياسى» اكسيونەرلىك قوعامىندا بەلارۋس ەلىنەن كەلگەن قوناقتارعا جەردى قاشىقتىقتان زوندتاۋدىڭ عارىشتىق جۇيەسى كورسەتىلدى. ال Astana IT University دەلەگاسيا مۇشەلەرىنە قازاقستان رەسپۋبليكاسىندا گەواقپاراتتىق قامتاماسىز ەتۋ كادرلارىن دايارلاۋدىڭ وقۋ پروسەسىن كورسەتتى. ۇلتتىق گەودەزيا جانە كەڭىستىكتىك اقپارات ورتالىعىندا بەلارۋس اسكەريلەرى قازاقستان رەسپۋبليكاسىنداعى توپوگرافيالىق-گەودەزيالىق جانە كارتوگرافيالىق ونىممەن تانىستى.