اسىرەسە استىق جونەلتۋ كولەمى ارتتى
بيىلعى 5 ايدا قازاقستان مەن ازەربايجان اراسىنداعى تەمىرجول تاسىمالىنىڭ كولەمى بىلتىرعىمەن سالىستىرعاندا 3،5 ەسە ارتتى. بۇل تۋرالى قازاقستان تەمىرجولى ۇلتتىق كومپانياسىنىڭ باكۋدەگى وكىلدىگى مالىمدەدى، دەپ حابارلايدى Almaty-akshamy.kz.
ماسەلەن، قاڭتار-مامىر ارالىعىندا «قازاقستان تەمىر جولى» ۇك مەن «ازەربايجان تەمىر جولى» جاق (جابىق اكسيونەرلىك قوعامى) اراسىنداعى تاسىمالداۋ كولەمى 1388،1 مىڭ تونناعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 1088،8 تونناعا ارتىق.
اسىرەسە، ازەربايجانعا استىق جونەلتۋ كولەمى ارتتى. ياعني، كورسەتكىش 128،3 مىڭ توننانى قۇرادى. ال ازەربايجان ارقىلى ەلىمىزگە كەلەتىن مۇناي ونىمدەرى مەن قارا مەتال كولەمى 13،5 ەسە ۇلعايىپ، 884،6 مىڭ توننا بولدى. ازەربايجاننان جانە وسى ەل ارقىلى يمپورتتالاتىن تاۋارلاردىڭ اراسىندا حيميكاتتار مەن اس سوداسىنا سۇرانىس جوعارى.
ازىق-تۇلىك تاسىمالىنىڭ وسۋىنە بايلانىستى ترانزيتتىك تاسىمالدار دا 2 پايىزعا ارتىپ، 3،1 مىڭ تونناعا جەتتى. ازەربايجان اگرارلىق زەرتتەۋلەر ورتالىعىنىڭ دەرەگى بويىنشا قاڭتار-مامىر ارالىعىندا قازاقستاننان اتالاعان ەلگە 49،1 ملن دوللارعا استىق ەكسپورتتالعان. ازەربايجان استىق يمپورتىنىڭ 41،1% ەلىمىزدىڭ ۇلەسىندە.