قازاقستان رەسپۋبليكاسىنىڭ ازەربايجانداعى ەلشىسى ءالىم بايەل ازەربايجان رەسپۋبليكاسىنىڭ ەكونوميكا ءمينيسترى ميكايل دجابباروۆپەن كەزدەستى. تاراپتار ساۋدا-ەكونوميكا، ينۆەستيسيا، كولىك-لوگيستيكا، ەنەرگەتيكا جانە قۇرىلىس سالالارىنداعى ەكىجاقتى ىنتىماقتاستىقتىڭ قازىرگى جاعدايى مەن پەرسپەكتيۆالارىن تالقىلادى.
ءالىم بايەل ەكى ەل اراسىنداعى تاۋار اينالىمىنىڭ تۇراقتى ءوسىپ كەلە جاتقانىن اتاپ ءوتتى. بيىلعى جىلدىڭ العاشقى ءتورت ايىندا بۇل ءوسىم 20% قۇرادى. اسىرەسە، 2025 جىلى قازاقستاننىڭ العاش رەت ازەربايجانعا نەگىزگى بيداي جەتكىزۋشىگە اينالىپ، وسى ەلدىڭ استىق يمپورتىنىڭ 88% قامتاماسىز ەتكەنى ۇلكەن قاناعات سەزىمىن تۋدىرادى.
ءوز كەزەگىندە ميكايل دجابباروۆ قازاقستانمەن ەكونوميكالىق ىنتىماقتاستىقتى دامىتۋ ازەربايجان ءۇشىن ستراتەگيالىق ماڭىزعا يە ەكەنىن اتاپ ءوتتى. وسى ورايدا ول ترانسكاسپيي حالىقارالىق كولىك باعىتى (تحكب)، كاسپيي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن (توبج) تارتۋ، قازاقستاننىڭ ەنەرگيا رەسۋرستارىن ازەربايجان ارقىلى تاسىمالداۋ جانە كاسپيي تەڭىزىنىڭ تۇبىمەن ەلەكتر كابەلىن تارتۋ سىندى ءىرى بىرلەسكەن جوبالاردىڭ ىسكە اسىرىلۋىن جوعارى باعالادى. بۇل جوبالار گەوەكونوميكالىق تۇرعىدان بۇكىل ءوڭىر ءۇشىن ماڭىزدى.
ەلشى ءا. بايەل قازاقستان باسشىلىعى ازەربايجانمەن ونەركاسىپتىك كووپەراسيانى دامىتۋعا ەرەكشە كوڭىل ءبولىپ وتىرعانىن جەتكىزدى. وسى تۇرعىدا ول قازاقستاندا ينفۋزيالىق ەرىتىندىلەردى بىرلەسىپ ءوندىرۋدى جولعا قويۋدى ۇسىندى. سونىمەن قاتار، ءالىم بايەل ازەربايجان تاراپىنا الاكول جاعالاۋىندا ساۋىقتىرۋ-كۋرورتتىق كەشەنىن سالۋدى ۇسىندى. م. دجابباروۆ بۇل باستامالار بويىنشا ىنتىماقتاستىققا دايىن ەكەندەرىن ءبىلدىردى. تاراپتار جوبالاردى ىسكە اسىرۋدىڭ تەتىكتەرىن تالقىلادى.
سونداي-اق، تاراپتار تۇرعىن ءۇي مەن الەۋمەتتىك نىساندار سالۋ باعىتىندا قۇرىلىس كومپانيالارىنىڭ قىزمەتىن كەڭەيتۋ ماسەلەسىن تالقىلادى. ءقازىر قازاقستاننىڭ ءبىرقاتار كومپانياسى ازەربايجاندا مەديسينالىق جانە تۇرعىن ءۇي نىساندارىن سالۋدى باستاپ كەتكەنى ريزاشىلىقپەن اتالىپ ءوتتى. قازاقستان اۋماعىندا دا وسى باعىتتاعى ىنتىماقتاستىق مۇمكىندىكتەرى قاراستىرىلىپ جاتىر.