قازاقستان رەسپۋبليكاسى حالىقتى كوروناۆيرۋسقا قارسى ۆاكسينالاۋ بويىنشا تاۋەلسىز مەملەكەتتەر دوستاستىعى ەلدەرىنىڭ اراسىندا ءبىرىنشى ورىنعا شىقتى. بۇل تۋرالى پرەمەر-مينيستر اسقار مامين بۇگىن بۇقارالىق اقپارات قۇرالدارى وكىلدەرىمەن وتكەن كەزدەسۋىندە مالىمدەدى. سەبەبى ۆاكسينانىڭ ءبىرىنشى كومپونەنتىمەن قازاقستاندىقتاردىڭ 75 پايىزى ەگىلگەن. ال تولىق كۋرسىنان 69 پايىزى ءوتىپ ۇلگەردى. ءقازىر ەلدە Pfizer ەكپەسىمەن ەگۋ جۇمىستارى ءجۇرىپ جاتىر، دەپ حابارلايدى Almaty.tv ءتىلشىسى.
12 قاراشادان باستاپ ەلدىڭ ءار وڭىرىندە بۇرىن-سوڭدى يممۋندالماعان توپتار Pfizer ۆاكسيناسىن الىپ جاتىر.
وسى 4 تاۋلىك ىشىندە تەك الماتى قالاسىندا امەريكالىق ۆاكسينانى سالعىزعاندار سانى 1152 ادامعا جەتتى. بۇل تۋرالى قالالىق قوعامدىق دەنساۋلىق باسقارماسى حابارلادى.
ءقازىر ولاردىڭ جاعدايى جاقسى. ەشقانداي شاعىم جوق. ال ەل پرەمەر-مينيسترى اسقار مامين Pfizer ەكپەسىن سالدىرا الاتىندار ءتىزىمى ۇلعايۋى مۇمكىن ەكەنىن ايتىپ وتىر. ءقازىر بۇل ماسەلە قارالىپ جاتىر. ال بۇگىن مەگاپوليستە بالالاردى Pfizer ەكپەسىمەن مەكتەپ قابىرعاسىندا ەگۋ باستالدى. بۇعان دەيىن ۆاكسينالاۋ تەك مەديسينالىق مەكمەلەردە جۇرگىزىلگەن ەدى. ءقازىر ءبىلىم وردالارى ەگۋ جۇمىسىنا ساقاداي ساي. وقۋشىلار ءتىزىمى جاسالعان. جەرگىلىكتى ەمحانالار بالا سانىنا سايكەس ۆاكسينا مولشەرىن شاقتاپ جەتكىزىپ جاتىر.
ال قاراشا ايىنىڭ اياعىندا ۆيرۋسپەن كۇرەستە الدىڭعى شەپتە جۇرگەندەردى ريەۆاكسينالاۋ ناۋقانى باستالادى. بۇل تىزىمگە قاريالار مەن يممۋنيتەتى ءالسىز ادامدار ىلىگىپ وتىر. ال حالىقتى جاپپاي ءۇشىنشى مارتە ەگۋ كەلەسى جىلعا جوسپارلانعان. وسى رەتتە دارىگەرلەر قانت ديابەتى، سوزىلمالى جانە گيپەرتونيالىق اۋرۋلارى بار ناۋقاستارعا ۆاكسينانىڭ كۇشەيتكىش دوزاسىن ۋاقىتىنان كەشىكتىرمەي الۋعا كەڭەس بەردى. سەبەبى مەگاپوليستە جۇقپالى رەسپيراتورلى ۆيرۋس ءورشىپ تۇر. وتكەن جىلى بۇل ۋاقىتتا تۇماۋ جۇقتىرعاندار قاتارى 4 ەسەگە تومەن ەدى. سوندىقتان تۇماۋعا قارسى ەكپە سالعىزۋ دا ارتىقشىلىق ەتپەيدى ەكەن.
«يممۋندىق جۇيەنىڭ وزىنە عانا ءتان ەرەكشە قاسيەتى بار. انتيدەنەلەر ۆيرۋسپەن كۇرەسكەن سايىن، جاسۋشانىڭ ەستە ساقتاۋ قابىلەتى كۇشەيە تۇسەدى. ياعني، ادام كوروناۆيرۋستى نەمەسە باسقا دا جۇقپالى ۆيرۋس جۇقتىرسا، يممۋنيتەت وعان قارسى تۇرۋعا تىرىسادى. سوندىقتان كوپشىلىك ەكپەنىڭ ءۇشىنشى دوزاسى عانا ادام اعزاسىن ۆيرۋستان تولىق قورعايتىنىن ءتۇسىنۋى كەرەك»، – دەدى س.ج.اسفەندياروۆ اتىنداعى قازۇمۋ جالپى يممۋنولوگيا كافەدراسىنىڭ مەڭگەرۋشىسى ەلميرا بيتانوۆا.
ەل بويىنشا ۆاكسينالاۋ ناۋقانى باستالعالى 9 اي ۋاقىت ءوتتى. وسى رەتتە قورعانىس مينيسترلىگى اقپان ايىندا يممۋندالعان اسكەريلەردىڭ بارلىعى ريەۆاكسينالاۋ ناۋقانىنا دايىن ەكەنىن حابارلاپ وتىر. ەندى قارۋلى كۇشتەر قۇرامىنداعى قىزمەتكەرلەرگە قاراشا ايىنىڭ سوڭىندا ۆاكسينانىڭ كۇشەيتكىش دوزاسى ەگىلمەك.
«ول ءۇشىن ءبىر عانا دوزا ۆاكسينا قولدانىلاتىن بولادى. قارۋلى كۇشتەردىڭ جەكە قۇرامى ريەۆاكسيناسيالاۋدىڭ ماڭىزدىلىعىن جاقسى تۇسىنەدى. ويتكەنى، كوروناۆيرۋس ينفەكسياسىنىڭ جاڭا شتامدارىنا قارسى تولىققاندى دايىن بولۋ ءۇشىن ريەۆاكسينالاۋ وتە ماڭىزدى»، – دەدى ق ر قك باس اسكەري-مەديسينالىق باسقارماسىنىڭ باستىعى الىبەك مانابايەۆ.
ءقازىر ەلىمىزدە ەپيداحۋال جاقسارىپ كەلەدى. بۇعان دەيىن «سارى» ايماقتا بولعان الماتى قالاسى دەمالىس كۇندەرى «جاسىلعا» ءوتتى. ەندى مەگاپوليستە ءبىر اپتا بويى كوروناۆيرۋستىڭ تارالۋى بويىنشا جاعداي باقىلاۋدا بولادى. كوۆيدتىڭ ءورشۋى بولماعان جاعدايدا ءبىرقاتار شەكتەۋلەر جەڭىلدەتىلەدى. ماسەلەن «اشىق» قوسىمشاسى ارقىلى جۇمىس ىستەيتىن نىسانداردىڭ قىزمەت ۋاقىتى تاعى ەكى ساعاتقا ۇزارادى. سونداي-اق قوعامدىق ورىنداردا مەيماندار سانىن ارتتىرۋعا رۇقسات ەتىلەدى.