قازاقستان كومپانيالارى حالىقارالىق قۇرىلىس كورمەسىندە ونىمدەرىن تانىستىردى

«UzBuild – 2023» حالىقارالىق قۇرىلىس كورمەسى ءوتىپ جاتىر.

تمد كەڭىستىگىندەگى ەڭ اۋقىمدى شارا بيىل تاشكەنتتە ۇيىمداستىرىلدى. الەمنىڭ 22 مەملەكەتىنەن 350-گە تارتا كومپانيا قۇرىلىس ماتەريالدارىن تانىستىردى، دەپ حابارلايدى Almaty-akshamy.kz 24.kz-كە سىلتەمە جاساپ. 

قازاقستان كورمەگە گازوبلوك، پوليۋرەتان، تاقتايشا، جىلۋ وقشاۋلاعىش جانە ءتۇرلى-تۇستى بوياۋ ونىمدەرىن ۇسىندى. ارنايى قۇرىلىس تەحنيكاسى مەن مەتالل بۇيىمدار دا بار. بۇلاردىڭ كوبىنىڭ وزبەكستان نارىعىندا بالاماسى جوق. سوندىقتان جەرگىلىكتى مەردىگەرلەر تاراپىنان جوعارى سۇرانىس يە بولا باستادى. ال گازوبلوك شىعاراتىن زاۋىتقا گرۋزيادا ءوندىرىس اشۋ جونىندە ۇسىنىس جاسالدى. ءقازىردىڭ وزىندە كاسىپورىننىڭ ەلىمىز بەن وزبەكستاندا بىرنەشە وندىرىستىك الاڭى بار. تاعى ءبىر ەرەكشەلىگى، قازاقستاندا جاسالاتىن بەتون تاقتايشالار ەندى تاشكەنت قالاسىن اباتتاندىرۋعا قولدانىلۋى مۇمكىن. ءوندىرۋشى كورمە بارىسىندا بىرنەشە كوممەرسيالىق كەلىسىم جاساپ ۇلگەردى.

«وسى كۇندەرى قالانى ارالادىق.اباتتاندىرۋ جاعىنان الەۋەتى مول ەكەن. الماتى سەكىلدى بەزەندىرۋگە كەلەتىن قالا»، - دەيدى تاقتايشا شىعاراتىن زاۋىت ديرەكتورىنىڭ ورىنباسارى ءاليا ومىرالييەۆا.

«بوياۋ شىعاراتىن الەمدىك برەندتىڭ قازاقستاندا وكىلدىگى بار. الماتى ماڭىنداعى زاۋىتتا دايىنداپ، ورتالىق ازيا نارىعىنا تاراتامىز. بوياۋدىڭ سان ءتۇرى شىعارىلادى. وزبەكستان - جاڭا نارىق. مۇندا بيزنەستى دامىتۋعا كوپ مۇمكىندىك بار»، - دەيدى  بوياۋ شىعاراتىن كومپانيانىڭ ساۋدا مەنەدجەرى ءىلياس بەيسەنبەك.