بۇگىن تەحنيكالىق جانە كاسىپتىك ءبىلىم بەرۋ ۇيىمدارىنا قۇجات قابىلداۋ باستالدى
ابيتۋريەنتتەر كوللەدجدە وقۋعا ەكى تاسىلمەن ءوتىنىم بەرە الادى: 25 ماۋسىمنان باستاپ قاعاز تۇرىندە جانە 1 شىلدەدەن باستاپ egov.kz پورتالى ارقىلى ەلەكتروندى نىساندا، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
9 سىنىپ بىتىرۋشىلەر ءۇشىن قۇجات قابىلداۋ مەرزىمى 25 ماۋسىمنان 18 تامىزعا دەيىن، ال 11 سىنىپ بىتىرۋشىلەر ءۇشىن 25 ماۋسىمنان 20 تامىزعا دەيىن جالعاسادى:
- شىعارماشىلىق ماماندىقتار بويىنشا – 25 ماۋسىمنان 20 شىلدەگە دەيىن،
- پەداگوگيكالىق جانە مەديسينالىق ماماندىقتار بويىنشا – 25 ماۋسىمنان 15 تامىزعا دەيىن.
ورتا بۋىن ماماندىقتارى مەن قولدانبالى باكالاۆرعا تۇسۋشىلەر ءۇشىن وقۋعا قابىلداۋ اتتەستاتتىڭ ورتاشا بالى نەگىزىندە جۇرگىزىلەدى. باعالاپ ءبولۋ مىندەتتى جانە بەيىندىك پاندەردىڭ ورتاشا كونكۋرستىق بالى نەگىزىندە اۆتوماتتاندىرىلعان اقپاراتتىق جۇيە ارقىلى جۇزەگە اسىرىلادى.
جۇمىسشى ماماندىعىنا تۇسەتىن تۇلەكتەر اڭگىمەلەسۋ قورىتىندىسى بويىنشا قابىلدانادى.
پەداگوگيكالىق، مەديسينالىق جانە شىعارماشىلىق ماماندىقتار بويىنشا وقۋعا تۇسەتىن تۇلەكتەر ارنايى جانە شىعارماشىلىق ەمتيحاندار تاپسىرادى نەمەسە اڭگىمەلەسۋدەن وتەدى. ونى قابىلداۋ كوميسسيالارى جۇرگىزەدى. وقۋعا تۇسۋشىلەر ءۇشىن كونكۋرستار 19-25 تامىز، ونەر جانە مادەنيەت ماماندىقتارى بويىنشا 29 شىلدە-2 تامىز ارالىعىندا وتەدى.
ايتا كەتۋ كەرەك، تالاپكەرلەر قۇجاتتاردى بىردەن 4 كوللەدجگە 4 ماماندىق بويىنشا تاپسىرا الادى. بيىلعى جىلى مەملەكەتتىك ءبىلىم بەرۋ تاپسىرىسى بويىنشا بارلىعى 145 مىڭ ابيتۋريەنتتى وقۋعا قابىلداۋ جوسپارلانۋدا، بۇل وتكەن جىلدان 10 مىڭ ورىنعا ارتىق.