قازاقستاندا اۋىل شارۋاشىلىعىندا جاڭا سالا پايدا بولۋى مۇمكىن. بۇل - كاربون ەگىنشىلىگى.
ەلوردادا وتكەن حالىقارالىق ينۆەستورلار اپتالىعىنا قاتىسۋشىلار پايدالانىلماعان جەرلەردى وسىنداي تاسىلمەن يگەرۋدى ۇسىنىپ وتىر. كاربون شارۋاشىلىعى كومىرتەكتى اتموسفەرادان وسىمدىكتەر مەن توپىراققا اۋىستىرۋ تەحنولوگياسىنا نەگىزدەلەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
مامانداردىڭ ايتۋىنشا، بۇل كومىرقىشقىل گازىنىڭ قالدىقتارىن ايتارلىقتاي ازايتۋعا كومەكتەسەدى. سايىپ كەلگەندە، بۇل سالانىڭ دامۋى جاھاندىق جىلىنۋعا قارسى تۇرۋعا باعىتتالعان. فورۋمعا قاتىسۋشىلار رەسپۋبليكادا كاربون شارۋاشىلىعىنىڭ الەۋەتى زور ەكەنىن اتاپ ءوتتى. سەبەبى قازاقستاندا جالپى اۋدانى 220 ميلليون گەكتاردان استام جەرگە تەڭ اۋىل شارۋاشىلىعى القاپتارىنىڭ تەك 20% پايدالانىلادى
«2050 جىلعا قاراي ءبىزدىڭ ورتاق ماقساتىمىز – كومىرتەگى بەيتاراپتىعىنا، ياعني نولدىك تەڭگەرىمگە قول جەتكىزۋ. الايدا، زەرتتەۋلەر كورسەتكەندەي، بۇل جەتكىلىكسىز بولادى. كومىرتەكتى اتموسفەراعا شىعارعاننان الدەقايدا كوپ ءسىڭىرۋ قاجەت بولادى. سوندىقتان اۋىل شارۋاشىلىعى سالاسى وسى ۇدەرىستىڭ نەگىزگى قوزعاۋشى كۇشتەرىنىڭ بىرىنە اينالۋى ءتيىس دەپ ەسەپتەيمىز. ءقازىر كاربون شارۋاشىلىعى اقش پەن ەۋروپادا بىرتىندەپ قابىلدانۋدا. ال، قازاقستان بولاشاقتا بۇكىل ەۋرازيادا وسى سالانىڭ ورتالىعىنا اينالۋى مۇمكىن»، - وكسفورد ۋنيۆەرسيتەتى ەكولوگيالىق وزگەرۋ ينستيتۋتىنىڭ ديرەكتورى مايكل وبەرشتاينەر.