قازاقستان جىلىنا جارتى ميلليون ماشينا شىعارۋى كەرەك - مينيستر

بۇل - 2026 جىلعا قاراي جۇزەگە اسا باستاۋى ءتيىس مىندەت. 

ەلىمىزدە سوڭعى جىلدارى اۆتو ءوندىرىس كولەمى ارتىپ كەلەدى. يندۋستريا جانە ينفراقۇرىلىمدىق دامۋ ءمينيسترى مارات قارابايەۆ وتكەن جىلى ەلدە 100 مىڭنان استام جەڭىل اۆتوكولىك قۇراستىرىلعانىن ايتتى، دەپ حابارلايدى Almaty-akshamy.kz.

«جالپى، اۆتوموبيل جاساۋ – ەلىمىزدەگى جاڭا باعىت. ءبىز بۇل سالادا شامامەن 10 جىل بۇرىن جۇمىس ىستەي باستادىق. وتكەن جىلى اۆتوموبيل ءوندىرىسى 100 مىڭنان استام جەڭىل ماشينانى كورسەتتى. بۇعان دەيىن اۆتوموبيل  قۇراستىرۋعا باسا ءمان بەرىلەتىن. ەندى ءبىز لوكاليزاسيانى تەرەڭدەتە تۇسەمىز، تالاپتاردى قاتايتامىز. ءار برەندتەن ءبىر مودەلدى ۇساق قۇراستىرۋ ارقىلى جيناۋ كەرەك. شاعىن قۇراستىرۋ – 2 مىڭنان استام وپەراسيانى قۇرايدى، بۇل وراسان زور جۇمىس. وعان قوسا، جاڭا جوبالار دا بار. ءبىز شينالار ءوندىرىسىن باستادىق، اككۋمۋلياتورلار مەن الدىڭعى بامپەرلەر شىعارا باستادىق. ءارى قارايعى مىندەت – جەرگىلىكتى ءوندىرىستى دامىتۋ»، - دەدى مينيستر.

سونداي-اق، يندۋستريا ءمينيسترى ەلىمىزدە اۆتو ءوندىرۋ كولەمى ارتىپ كەلە جاتقانىن ايتتى.

«ەگەر قازاقستان نارىعى – 150 مىڭ ماشينا بولسا، كەلەسى جىلى قازاقستاندىق ءاۆتووندىرىس 150 مىڭ ماشينانى شىعارادى. ياعني، نارىقتىڭ جاڭا اۆتوكولىكتەرگە دەگەن قاجەتتىلىگى تولىعىمەن جابىلادى. ءبىرقاتار جاڭا جوبالار بار. ءبىزدىڭ مىندەتىمىز - 2026 جىلعا قاراي قازاقستان جىلىنا جارتى ميلليون ماشينا شىعارۋى ءۇشىن ءوندىرىس كولەمىن 500 مىڭعا دەيىن ارتتىرۋ»، - دەدى مارات قارابايەۆ.