قازاقستان جاڭا دەموكراتيالىق مودەلگە كوشتى

ەلىمىزدە كونستيتۋسيالىق سوت سۋديالارىنىڭ وكىلەتتىك مەرزىمىن 8 جىلعا دەيىن ۇلعايتۋ كوزدەلىپ وتىر.

بۇل تۋرالى ق ر پارلامەنتى پالاتالارىنىڭ بىرلەسكەن وتىرىسىندا ادىلەت ءمينيسترى قانات مۋسين ايتتى، دەپ حابارلايدى Almaty-akshamy.kz.

«الەمدىك پراكتيكاعا سايكەس، كونستيتۋسيالىق سوت سۋديالارىنىڭ وكىلەتتىك مەرزىمى ولاردى تاعايىندايتىن ادامداردىڭ وكىلەتتىك مەرزىمىنەن اسىپ كەتۋى كەرەك. مىسالى، گەرمانيا، يتاليا، يسپانيا، پورتۋگاليا جانە باسقا دا ءبىرقاتار ەلدەردىڭ كونستيتۋسيالىق سوتتارى وسىلاي قالىپتاسادى. بۇل كونستيتۋسيالىق سوت سۋديالارىنىڭ ءارتۇرلى ساياسي كۇشتەردىڭ اسەرىنەن تاۋەلسىزدىگىنىڭ نەگىزگى كەپىلى»، - دەدى «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن تانىستىرعان مينيستر.

قانات ءمۋسيننىڭ اتاپ وتۋىنشە، وسىعان بايلانىستى زاڭ جوباسىندا كونستيتۋسيالىق سوتتىڭ سۋديالارى قايتا تاعايىندالۋىنا شەكتەۋ قويا وتىرىپ، كونستيتۋسيالىق سوت سۋديالارىنىڭ وكىلەتتىك مەرزىمدەرىن 8 جىلعا دەيىن ۇلعايتۋ كوزدەلگەن.

بۇعان دەيىن ق.مۋسين استانا اتاۋىن قايتارۋعا قاتىستى ايتا كەلە: «ەلوردا اتاۋىن وزگەرتۋ ماسەلەسىن ازاماتتار ۇزاق ۋاقىت بويى كەڭىنەن تالقىلاۋدا. ول كەزدەسۋلەر بارىسىندا جانە رەفەرەندۋم كەزىندە ازاماتتاردىڭ ۇندەۋلەرىندە كوتەرىلدى. سوندىقتان قوعامدىق پىكىردى ەسكەرە وتىرىپ، دەپۋتاتتاردىڭ بۇل ۇسىنىسى زاڭ جوباسىنا ەنگىزىلدى»، - دەگەن بولاتىن.

سونداي-اق ادىلەت ءمينيسترى پرەزيدەنتتىڭ مانداتىن قايتا سايلانۋ مۇمكىندىگىنسىز ءبىر مەرزىمگە شەكتەۋ تۋرالى نورما كونستيتۋسيانىڭ اجىراماس بولىگىنە اينالاتىنىن اتاپ ءوتتى.