ماسكەۋ. قازاقپارات – قازاقستان قۇراماسى حالىقارالىق ارميا ويىندارىندا ءتورت التىن، ءبىر كۇمىس مەدال يەلەنىپ، جالپىكوماندالىق ەسەپتە ءۇشىنشى ورىن الدى، دەپ حابارلايدى Almaty-akshamy.kz Inform.kz-كە سىلتەمە جاساپ.
ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتكەندەي، ماسكەۋ ماڭىنداعى «الابينو» پوليگونىندا حالىقارالىق ارميا ويىندارىنىڭ سالتاناتتى جابىلۋى ءوتتى.
شاراعا قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆتىڭ باسشىلىعىمەن قازاقستاندىق دەلەگاسيا قاتىستى.
ويىنداردىڭ بەيرەسمي كوماندالىق ەسەبىندە قازاقستان قۇراماسى رەسەي مەن وزبەكستان ەلدەرىنەن كەيىنگى ءۇشىنشى ورىندى يەلەندى.
اتاپ ايتساق، قازاقستان كومانداسى جامبىل وبلىسىندا وتكەن «ارتيللەريادان وق اتۋ شەبەرلەرى» بايقاۋىندا التىن مەدال الدى. اسكەري قىزمەتشىلەرىمىز قاراعاندى وبلىسىندا «تاكتيكالىق مەرگەن» بايقاۋىندا دا ءبىرىنشى ورىن الدى. سونداي-اق ۇزدىك ناتيجە اقمولا وبلىسىنىڭ «مەريديان» سايىسىندا، ارمەنيادا وتكەن «بەيبىتشىلىك جاۋىنگەرى» سايىسىندا تىركەلدى.
بۇدان بولەك، قازاقستاننىڭ اسكەري تەڭىزشىلەرى ازەربايجانداعى «تەڭىز كۋبوگىنىڭ» كۇمىس جۇلدەسىن جەڭىپ الدى.
كاباردينو-بالكارياداعى «ەلبرۋس شەڭبەرى» بايقاۋىندا اسكەري الپينيستەرىمىز ءبىرقاتار كۇردەلى تاپسىرمانى ورىنداپ، ءتورتىنشى ورىنعا يە بولدى. تارتىستى جارىستا رەسەي، وزبەكستان جانە جۇڭگو قارسىلاستارى ۇزدىك شىقتى.
«تانك بياتلونىنىڭ» اقتىق سىنىنا ءبىر قادام قالعاندا قازاقستاندىق تانكيستەر جارتىلاي فينال ەستافەتاسىندا قىتايلىق اسكەري قىزمەتشىلەرگە جول بەردى.
ايتا كەتەيىك، VIII حالىقارالىق ارميا ويىندارى 12 ەلدىڭ 30 پوليگونىندا ءوتتى. «ارحو-2022» باعدارلاماسى دالالىق، اۋەدەگى جانە تەڭىزدەگى جاۋىنگەرلىك ماشىقتى كورسەتۋ بويىنشا 34 بايقاۋدان تۇردى.
قازاقستاندىق اسكەري قىزمەتشىلەر جەتى بايقاۋدا باعىن سىنادى، ولاردىڭ ۇشەۋى ەل اۋماعىندا وتكىزىلدى.