«قازاقستان حالقىنا» قورىنىڭ شاپاعاتىن كورىپ جۇرگەندەر از ەمەس

قازاقستاندىق ەكى جاسوسپىرىمگە «قازاقستان حالقىنا» قورى كومەگىمەن زاماناۋي پروتەز ساتىپ الىندى.

ادامنىڭ جۇيكە جۇيەلەرى ارقىلى باسقارىلاتىن يننوۆاسيالىق جاساندى قولداردى تالعار اۋدانى، بەلبۇلاق اۋىلىنداعى جەكە كلينيكانىڭ ماماندارى جاساعان، دەپ حابارلايدى Almaty-akshamy.kz 24.kz-كە سىلتەمە جاساپ. 

38 ملن تەڭگە تۇراتىن پروتەزدەر قور قاراجاتىنان وتەلدى. اتىراۋ وبلىسىنان كەلگەن ءاقمولدىر تىلەۋقۇلوۆانىڭ تۋعاننان بەرى سول قولى شىنتاعىنان جوق. مۇنى كەمىستىك ەمەس، ەرەكشەلىك دەپ قابىلداعان ول: «تاعدىرعا مويىعان كەزىم جوق»، – دەيدى. بالا كەزىنەن سپورتتى سەرىك ەتكەن قايسار قىز ءقازىر دەنە شىنىقتىرۋ جانە سپورت ماماندىعى بويىنشا ءبىلىم الىپ ءجۇر. ۇستەل تەننيسىنە قاتىسادى. جاڭا پروتەزگە دە تەز بەيىمدەلىپ الىپتى.

«وسىنى ەستىگەن كەزدە، قۋانىپ كەتتىم. بۇرىنعى پروتەزدى ءجاي عانا بار سياقتى سەزىنگەنمەن، قازىرگى پروتەز اشىلىپ-جابىلىپ، ءار زاتىڭدى ۇستاي بەرەسىڭ. ەسىكتى دە اشىپ ۇيرەندىم»، - دەيدى ەمدەلۋشى ءاقمولدىر تىلەۋقۇلوۆا.

بيونيكالىق پروتەز جۇيكە جۇيەلەرى ارقىلى باسقارىلادى. ياعني جاساندى قول بۇلشىق ەتتەردىڭ  جيىرىلۋىنا جاۋاپ بەرەتىن سەنسورلارمەن جابدىقتالعان. ناۋقاسقا كيگىزەر كەزدە ارنايى باعدارلاما ارقىلى ىسكە قوسىلادى.

«بۇل پروتەزدەر ادامنىڭ مۇقتاجدىقتارىنا قولايلى ەتىپ جاسالعان. پاسيەنت  كۇندەلىكتى ومىردە  ەشقانداي قيىندىقسىز قيمىلداي الادى. سوڭعى تەحنولوگيامەن جاسالعان پروتەزدەردى 20 كۇندە دايىنداپ، قولدانۋعا بەرەمىز. مۇنداي پروتەزدەر تەك قازاقستاندا عانا تەگىن بەرىلۋدە. باسقا ەلدەردە مەملەكەت تاراپىنان ستاندارتتى پروتەزدەر عانا جاسالادى»، - دەيدى تەحنيك-پروتەزشى يساك شاابان. 

قوردىڭ شاپاعاتىن كورگەن ءاقمولدىر عانا ەمەس. «قازاقستان حالقىنا» قورى ارقىلى بۇعان دەيىن 41 ناۋقاس زاماناۋي پروتەزگە يە بولعان. كەلەر جىلى مامىر ايىنا دەيىن تاعى 150 مۇمكىندىگى شەكتەۋلى ادامعا بيونيكالىق پروتەز قويۋ جوسپاردا بار.