وليگارحتار قاراجات بەرۋگە ءالى دە اسىقپاي جاتقان سەكىلدى
مەملەكەت باسشىسى قاسىم-جومارت توقايەۆ «حابار» جانە «حابار 24» تەلەارنالارىنا بەرگەن سۇحباتىندا «قازاقستان حالقىنا» قورى تۋرالى سۇراقتارعا جاۋاپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستان حالقىنا» قورىندا 20 ملرد تەڭگەدەن استام قاراجات جينالدى. ءبىراق وليگارحتار قاراجات بەرۋگە ءالى دە اسىقپاي جاتقان سەكىلدى. قاراجات تۇراقتى ءتۇسىپ تۇرۋى ءۇشىن ولارعا قانداي شارا قولداناسىزدار؟ قوردىڭ جۇمىسى قالاي جولعا قويىلۋى كەرەك؟»، - دەپ سۇراق قويدى تەلەجۇرگىزۋشى.
«قازىرگى ۋاقىتتا قورداعى قاراجات 20 ملرد تەڭگەدەن استى، شامامەن 50 ملرد تەڭگەدەي ءتۇستى. جەكە ءوزىم بۇل قوردىڭ جۇمىسىنا ارالاسپايمىن. ونىڭ جەتەكشىسى رەتىندە بۇرىنعى قارجى ءمينيسترى بولات جامىشيەۆ تاعايىندالدى. قامقورشىلىق كەڭەس بار، ونىڭ دا قۇرىلىمىنا قاتىسپايمىن. ولار قوعامدىق نەگىزدەردە جۇمىس ىستەيدى. مەنىڭ مىندەتىم – وسى قورعا جارنالاردىڭ ءتۇسۋىن ىنتالاندىرۋ. مەنىڭشە، بۇل دابىل انىق جەتكىزىلدى»، - دەدى قاسىم-جومارت توقايەۆ.
ءوز سوزىندە پرەزيدەنت مۇنىڭ سالىق ەمەس، قايىرىمدىلىق ەكەنىن، دەگەنمەن قانداي دا ءبىر پارامەترلەر ورناتۋ قاجەتتىگىن ايتتى.
«مەنىڭ بىلۋىمشە، ۇكىمەت سالىق سالىناتىن تابىسقا 3 پروسەنتتى بەلگىلەدى، بۇل وتە ءىرى، ايتارلىقتاي ءىرى بيزنەستەرگە قاتىستى. «قازاقستان حالقىنا» قورى اۋرۋ بالالارعا، بالالار سپورتىن، اسىرەسە اۋىلدىق جەردەگى سپورتتى دامىتۋعا، الماتىنى قالپىنا كەلتىرۋگە، مادەنيەتتى كوتەرۋگە جانە باسقا دا ماسەلەلەردى شەشۋگە كومەكتەسەدى. ونى قامقورشىلىق كەڭەس شەشەدى. (...) ءبارىن كومەكپەن قامتۋ قورعا قانشا قاراجات جينالعانىنا بايلانىستى بولادى. ءارى قاراي قامقورشىلىق كەڭەس شەشىم قابىلدايدى»، - دەدى مەملەكەت باسشىسى.
ايتا كەتەيىك، «قازاقستان حالقىنا» قورىنا 16-27 قاڭتار ارالىعىندا 52 ملرد تەڭگەدەن استام قارجى تۇسكەن.