«قازاقستان حالقىنا» قورى

پرەزيدەنت تاپسىرماسى

 مەملەكەتتىك قولداۋ شارالارىنان تىس قازاقستاندىقتاردىڭ  ناقتى ماسەلەلەرىن شەشۋگە باعىتتالعان

مەملەكەت باسشىسى 2022 جىلى دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ سالالارىنداعى ماسەلەلەردى شەشۋ ءۇشىن «قازاقستان حالقىنا» قوعامدىق الەۋمەتتىك قورىن قۇرۋدى تاپسىرعان بولاتىن. ناتيجەسىندە مۇددەلى تاراپتاردىڭ قاجەتتىلىكتەرىن قاناعاتتاندىرۋعا ارنالعان جانە قازاقستان حالقىنا كومەك كورسەتۋدىڭ ءتيىمدى قۇرالىنا اينالعان قور تۇجىرىمداماسى جارىق كوردى.      

تۇجىرىمداما اياسىندا قور قىزمەتىنىڭ نەگىزگى باعىتتارى مەن قورعا تۇسەتىن قاراجات ەسەبىنەن باسىم قولداۋ كورسەتىلەتىن حالىقتىڭ نەگىزگى ساناتتارى انىقتالدى.سونداي ساناتتاردىڭ ءبىرى –  ەلىمىزدە توتەنشە جاعدايلار جاريالانعاندا جانە توتەنشە جاعداي رەجيمىن ەنگىزۋ كەزىندە زارداپ شەككەن حالقىنا كومەك كورسەتۋ. قوردىڭ ينتەرنەت-رەسۋرسىندا  قاڭتار وقيعالارىندا زارداپ شەككەندەرگە  كومەك كورسەتۋ باعىتىنداعى قايىرىمدىلىق كومەك الۋشىلاردىڭ ماقساتتىق توبىنىڭ ءتىزىمى جاريالاندى.

ولار:

1) قازا تاپقان اسكەري قىزمەتشىلەردىڭ، ىشكى ىستەر مەن ۇلتتىق قاۋىپسىزدىك ورگاندارىنىڭ قىزمەتكەرلەرىنىڭ وتباسىلارى؛

2) اۋىر جاراقاتتار العان اسكەري قىزمەتشىلەر، ىشكى ىستەر مەن ۇلتتىق قاۋىپسىزدىك ورگاندارىنىڭ قىزمەتكەرلەرى؛

3) قاڭتار وقيعالارىنىڭ كەزدەيسوق قۇرباندارى بولعان قازا تاپقان ازاماتتىق تۇلعالاردىڭ وتباسىلارى؛

4) قاڭتار وقيعالارى كەزىندە جاراقاتتار العان بالالاردىڭ وتباسىلارى؛

5) قاڭتار وقيعالارى كەزىندە وقتان بولعان جاراقات العان اۋىر جارالانعان كامەلەتكە تولعان ازاماتتار.

6) قايعىلى قاڭتار وقيعالارى كەزىندە قازا تاپقان اسكەري قىزمەتشىلەردىڭ، ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنىڭ، سونداي-اق قازاقستان رەسپۋبليكاسىنىڭ قازا تاپقان ازاماتتارىنىڭ وتباسىلارىنداعى كامەلەتكە تولماعان بالالار.

 باعدارلاما بيۋدجەتى

 باعدارلاما بيۋدجەتىندە قازا تاپقان اسكەري قىزمەتشىلەردىڭ، ىشكى ىستەر مەن ۇلتتىق قاۋىپسىزدىك ورگاندارى قىزمەتكەرلەرىنىڭ وتباسىلارىنا – 7 ملن تەڭگەدەن قاجى تولەۋ قاراستىرىلعان. اۋىر جاراقاتتار العان اسكەري قىزمەتشىلەرگە، ىشكى ىستەر مەن ۇلتتىق قاۋىپسىزدىك ورگاندارى قىزمەتكەرلەرىنە – 3 ملن تەڭگەدەن بولىنەدى. قاڭتار وقيعالارىنىڭ كەزدەيسوق قۇرباندارى بولعان قازا تاپقان ازاماتتىق تۇلعالاردىڭ وتباسىلارىنا – 7 ملن  تەڭگەدەن، ال دۇربەلەڭدە  جاراقاتتار العان بالالاردىڭ وتباسىلارىنا – 3 ملن  تەڭگەدەن، وقتان جاراقات العان اۋىر جارالانعان كامەلەتكە تولعان ازاماتتارعا – 3 ملن تەڭگەدەن تولەنەدى.

قايعىلى قاڭتار وقيعالارىندا زارداپ شەككەندەرگە قايىرىمدىلىق كومەك كورسەتۋ مەرزىمىمەن جانە كەزەڭىمەن شەكتەلمەگەن. قور قازاقستان رەسپۋبليكاسىنىڭ باس پروكۋراتۋراسىنىڭ ءتيىستى راستايتىن اقپاراتتى ۇسىنۋ فاكتىسى بويىنشا قايىرىمدىلىق كومەك كورسەتەدى.

جوبانىڭ اعىمداعى مارتەبەسى

2023 جىلعى 19 ساۋىردەگى جاعداي بويىنشا قور قايعىلى قاڭتار وقيعالارى بارىسىندا زارداپ شەككەن 653 ادامعا جالپى سوماسى 2 ملرد 465 ملن تەڭگەگە قايىرىمدىلىق كومەك كورسەتكەن. اتاپ ايتقاندا:

• قازا تاپقان 19 اسكەري قىزمەتشىنىڭ، ىشكى ىستەر جانە ۇلتتىق قاۋىپسىزدىك ورگاندارىنىڭ قىزمەتكەرلەرىنىڭ وتباسىلارىنا – 133 ملن تەڭگە (7 ملن تەڭگەدەن)؛


• اۋىر جاراقات العان 111 اسكەري قىزمەتشىگە، ىشكى ىستەر جانە ۇلتتىق قاۋىپسىزدىك ورگاندارىنىڭ قىزمەتكەرلەرىنە – 333 ملن تەڭگە (3 ملن تەڭگەدەن)؛


• قازا تاپقان اسكەري قىزمەتشىلەردىڭ، ىشكى ىستەر ورگاندارى مەن ۇلتتىق قاۋىپسىزدىك ورگاندارى قىزمەتكەرلەرىنىڭ وتباسىلارىنداعى 23 كامەلەتكە تولماعان بالاعا – 46 ملن تەڭگە (ءاربىر كامەلەتكە تولماعان بالاعا 2 ملن تەڭگەدەن)؛


• قاڭتار وقيعالارىنىڭ كەزدەيسوق قۇربانى بولعان 146 ازاماتتىڭ وتباسىلارىنا – 1 ملرد 22 ملن تەڭگە (7 ملن تەڭگەدەن)؛


• كەزدەيسوق قۇربان بولعان قازاقستان رەسپۋبليكاسىنىڭ قازا تاپقان ازاماتتارىنىڭ وتباسىلارىنداعى 131 كامەلەتكە تولماعان بالاعا – 262 ملن تەڭگە (ءاربىر كامەلەتكە تولماعان بالاعا 2 ملن تەڭگەدەن)؛


• اتىس قارۋىنان زارداپ شەككەن جانە جابىرلەنۋشى دەپ تانىلعان 210 اۋىر جارالانعان كامەلەتكە تولعان ازاماتتارعا – 630 ملن تەڭگە (3 ملن تەڭگەدەن)؛


• قاڭتار وقيعاسى كەزىندە جاراقات العان 13 بالانىڭ وتباسىلارىنا – 39 ملن تەڭگە (3 ملن تەڭگەدەن) قايىرىمدىلىق كومەك كورسەتىلگەن.

قوردىڭ قولداۋىمەن 7 ايلىق نارەستەنىڭ باۋىرى الماستىرىلدى

 «قازاقستان حالقىنا» قورى مەملەكەتتىك قولداۋ شارالارىنان تىس ءومىردىڭ نەگىزگى سالالارىنداعى قازاقستاندىقتاردىڭ ناقتى ماسەلەلەرىن شەشۋگە باعىتتالعان.

ماسەلەن، جاقىندا قوردىڭ باسپا ءسوز قىزمەتى استانادا  اۋىر حالدەگى 7 ايلىق بالاعا باۋىر ترانسپلانتاسياسى جۇرگىزىلگەنىن حابارلادى.

وپەراسيا «قازاقستان حالقىنا» قوعامدىق قورىنىڭ قولداۋىمەن جاپونيانىڭ ۇلتتىق دەنساۋلىق جانە دامۋ ورتالىعىنىڭ (توكيو ق.) ورگانداردى ترانسپلانتاسيالاۋ ورتالىعىنىڭ دارىگەرلەرىمەن بىرلەسىپ «1 جاسقا دەيىنگى بالالاردىڭ باۋىر ترانسپلانتاسياسى» تاقىرىبىندا تالىمگەرلىك شەبەرلىك سىنىبى شەڭبەرىندە جۇرگىزىلگەن. شاقىرتىلعان ماماندار «University Medical Center» قق قىزمەتكەرلەرىنە باۋىر ترانسپلانتاسياسىن جۇرگىزۋگە مۇقتاج ناۋقاستاردى وپەراسيا الدىنداعى دايارلاۋ، انەستەزيولوگيالىق جاردەماقى، جەدەل تەحنيكا جانە وپەراسيادان كەيىنگى باسقارۋ تاقىرىپتارى بويىنشا 3 كۇن بويى وقىتۋ جۇرگىزدى. ەرتە جاستاعى ناۋقاستارعا، اسىرەسە، دەنە سالماعى 10 كگ-نان از بالالارعا باۋىر ترانسپلانتاسياسى جەتكىلىكتى داعدى مەن تاجىريبەنىڭ بولماۋىنا بايلانىستى قازاقستان رەسپۋبليكاسىندا جۇرگىزىلمەيدى. سوندىقتان وسىنداي وقىتۋلاردىڭ جۇرگىزىلۋى، داعدىلار مەن تەحنولوگيالاردى مەڭگەرۋ دەرتتىڭ اسقىنۋ سانىن ازايتىپ، ناۋقاستاردىڭ ءومىر ءسۇرۋ ساپاسى مەن ۇزاقتىعىن جاقسارتادى.

نارەستەگە تۋعان اكەسى دونور بولعان. بالاعا اعزا اۋىستىرۋ ءۇشىن جاپونيا مەن نەپالدان ماماندار شاقىرىلىپ، قايىرىمدىلىق كومەك كورسەتىلگەن. وپەراسيا «University Medical Center» كورپوراتيۆتىك قورىنىڭ بازاسىندا وتكىزىلدى. ناتيجەسىندە وپەراسيا ءساتتى ءوتىپ، بالانىڭ وزدىگىنەن تىنىس الۋ مۇمكىن بولدى. جاعداي تۇراقتانعان سوڭ بالا مەن اكەسى اۋرۋحانادان شىعارىلدى. قازىرگى تاڭدا ولاردىڭ جاعدايى جاقسى.

«قازاقستان حالقىنا» قورى قىزمەتىنىڭ نەگىزگى ماقساتتارى

• دەنساۋلىق ساقتاۋ، ءبىلىم بەرۋ، الەۋمەتتىك قولداۋ، مادەنيەت جانە سپورت سالالارىندا قايىرىمدىلىق كومەك كورسەتۋ؛


• ازاماتتاردىڭ رۋحاني، تانىمدىق جانە وزگە دە گۋمانيستىك قاجەتتىلىكتەرىن قالىپتاستىرۋ جانە قاناعاتتاندىرۋ ءۇشىن قوعامدىق دەنساۋلىق، ءبىلىم، عىلىم، مادەنيەت، ونەر، اعارتۋ سالالارىنداعى قايىرىمدىلىق جوبالارىن ىسكە اسىرۋ؛


• رەسپۋبليكادا قايىرىمدىلىق مادەنيەتىن دامىتۋ، قوعامنىڭ، بيزنەستىڭ جانە مەملەكەتتىڭ قايىرىمدىلىققا سەنىمىن نىعايتۋ، قايىرىمدىلىقتىڭ بارلىق سۋبەكتىلەرىنىڭ ىمىراسى؛


• توتەنشە جاعدايلار كەزىندە جانە توتەنشە جاعداي رەجيمىن ەنگىزۋ كەزىندە قازاقستان رەسپۋبليكاسىنىڭ زارداپ شەككەن حالقىنا كومەك كورسەتۋ؛


• قازاقستان رەسپۋبليكاسىنىڭ اۋماقتىق تۇتاستىعى مەن قاۋىپسىزدىگىن قورعاۋ كەزىندە قۇقىق قورعاۋ ورگاندارى، ارناۋلى ورگاندار قىزمەتكەرلەرىنىڭ، اسكەري قىزمەتشىلەردىڭ، اۋىر جارالانعانداردىڭ جانە قازا تاپقان دەپ تانىلعانداردىڭ وتباسىلارىن قولداۋ؛


• قوردىڭ باسقارۋ ورگاندارىنىڭ شەشىمدەرىنە سايكەس وزگە دە قايىرىمدىلىق كومەك.

(دەرەككوز: qazaqstanhalqyna.kz).